ជំងឺកូវីដ១៩ បានបង្ខំឲ្យតារាចម្រៀងអង់គ្លេស Adele (អាដេល) ត្រូវលើកពេលការប្រគំតន្ត្រីផ្ទាល់លើកដំបូងរបស់នាងយ៉ាងតក់ក្រហល់ ក្រោយខកខានសម្ដែងមុខមហាជនអស់រយៈពេល៥ឆ្នាំ។

កំពូលតារាចម្រៀងអង់គ្លេស Adele (អាដេល) បានចេញវីដេអូសុំទោសអ្នកគាំទ្រ ក្រោយ កម្មវិធីប្រគំតន្ត្រីនៅទីក្រុងឡាសវេហ្គាស សហរដ្ឋអាមេរិក ត្រូវបានលើកពេលព្រោះក្រុមការងារពាក់កណ្ដាលបានឆ្លងជំងឺកូវីដ១៩។

តារាចម្រៀងវ័យ ៣៣ឆ្នាំរូបនេះបានត្រៀមខ្លួនសម្រាប់ការប្រគំតន្ត្រីរយៈពេល៣ខែនៅសណ្ឋាគារមួយកន្លែងក្នុងទីក្រុងឡាសវេហ្គាស ដែលវាគឺជាការប្រគំតន្ត្រីផ្ទាល់លើកដំបូងរបស់នាងគិតចាប់តាំងពីឆ្នាំ២០១៧មក។

ក្នុងវីដេអូ ម្ចាស់បទ “Rolling in the Deep” បាននិយាយពាក្យសុំទោសចំនួន៨លើក និងសុំទោសជាពិសេសដល់អ្នកដែលបានធ្វើដំណើរទៅកាន់ទីក្រុងឡាសវេហ្គាសរួចហើយ ក្នុងគោលបំណងចូលរួមការប្រគំតន្ត្រីនេះ ហើយ Adele (អាដេល) ក៏បានសន្យាថានឹងរៀបចំកាលវិភាគនៃការប្រគំតន្រ្តីឡើងវិញផងដែរ។

គួរដឹងថាការប្រគំតន្ត្រីនេះគឺរៀបចំឡើងក្នុងគោលបំណងផ្សព្វផ្សាយអាល់ប៊ុមចម្រៀងចុងក្រោយរបស់នាងមានចំណងជើងថា "30" (សឺតធី) ដែលបានជាប់លេខ១នៅ ៣០ប្រទេស ពេលដែលចេញផ្សាយកាលពីខែវិច្ឆិកា។ ក្រៅពី Adele តារាចម្រៀងល្បីៗជាច្រើនទៀតដូចជា Celine Dion (សេលីន ឌីអន) , Katy Perry (ខេធី ភើរី), Carrie Underwood (ខារី អាន់ឌើវូត), និង Usher (អាស្ហើ) ក៏បានលើកពេលប្រគំតន្ត្រីនៅ Las Vegas នាពេលថ្មីៗនេះដូចគ្នា ៕

ប្រែសម្រួល៖ វ៉ាន់ថន