សារមន្ទីរមនុស្សក្រមួន Madame Tussauds (ម៉ាដាម ធូសោដ) ដែលមានទីតាំងស្ថិតនៅតំបន់ Times Square (ថាមស៍ ស្វែរ) ទីក្រុងញ៉ូវយក បានដាក់តាំងបង្ហាញជាផ្លូវការនូវរូបក្រមួនរបស់ប្រធានាធិបតីអាមេរិកលោក Joe Biden (ចូ បាយដិន) និងអនុប្រធានាធិបតីអាមេរិកលោកស្រី Kamala Harris (ខាម៉ាឡា ហារីស)។

រូបក្រមួនរបស់បុគ្គលជាន់ខ្ពស់ទាំងពីរត្រូវបានដាក់តាំងបង្ហាញជាសកម្មភាពនៅក្នុងការិយាល័យប្រធានាធិបតីអាមេរិក ដែលក្នុងនោះមានការរៀបចំជាតុប្រធានាធិបតី  ដែលមានត្រាប្រធានាធិបតីនៅលើតុផងដែរ ខណៈដែលឈុតសំលៀកបំពាក់ដែលបានប្រើលើរូបក្រមួនទាំងពីរនេះគឺជាឈុតសំលៀកបំពាក់ដែលអ្នកទាំងពីរបានប្រើប្រាស់នៅក្នុងពិធីឡើងកាន់តំណែងរបស់ប្រធានាធិបតីទី៤៦ កាលពីឆ្នាំ២០២១។

នេះជាលើកដំបូងហើយដែលសារមន្ទីរ Madame Tussauds (ម៉ាដាម ធូសោដ) បានបង្កើតរូបក្រមួនសម្រាប់អនុប្រធានាធិបតីអមជាមួយរូបក្រមួនប្រធានាធិបតី។ ក្រុមវិចិត្រករបានចំណាយពេលប្រមាណ៦ខែក្នុងការសូនរូបមនុស្សក្រមួនទាំងពីរនេះ ដោយបង្កើតឡើងផ្អែកតាមរូបថតជាច្រើនសន្លឹក ដើម្បីឲ្យបានដូចគ្នាទៅនឹងរូបមនុស្សពិត៕

ប្រែសម្រួល៖ វ៉ាន់ថន