មហាអំណាចសេដ្ឋកិច្ចចិន ដែលជាសេដ្ឋកិច្ចធំបំផុតទី ២ របស់ពិភពលោក បានឃើញ ការស្ទុះងើបឡើងវិញយ៉ាងឆាប់រហ័សពីមេរោគឆ្លងកូវីដ១៩ ក្នុងរយៈពេល ២ឆ្នាំចុងក្រោយនេះ បានអនុញ្ញាតឱ្យរោងចក្រធ្វើប្រតិបត្តិការ និងចិញ្ចឹមចំណង់អាហារជាសកល សម្រាប់គ្រឿងអេឡិចត្រូនិច និងការផ្គត់ផ្គង់វេជ្ជសាស្ត្រ។

ក្នុងឆ្នាំ ២០២១ ប្រទេសចិន បានសម្រេចនូវការនាំចេញកើនឡើង ៣០% ធៀបនឹងការនាំចេញកាលពីឆ្នាំ២០២០ ដោយជួយជំរុញអតិរេកពាណិជ្ជកម្មប្រចាំឆ្នាំដល់ ៦៧៦ពាន់លានដុល្លារអាមេរិក ដោយអ្នកនាំពាក្យគយចិន បានលើកឡើងថា ការកើនឡើងនេះ ត្រូវបានគាំទ្រដោយការកើនឡើងនៃការដឹកជញ្ជូនផលិតផលមេកានិច និងអេឡិចត្រូនិច យ៉ាងណាមិញការនាំចូលរបស់ចិន កើនឡើង ៣០% ដូចគ្នា។

បើទោះបីជា ប្រទេសចិន បង្ហាញរបាយការណ៍ដ៏អស្ចារ្យមួយនេះ ក្នុងការប្រឈមមុខនឹងបញ្ហាកូវីដ១៩ក្តី អ្នកនាំពាក្យគយចិន បានបង្ហាញថា សេដ្ឋកិច្ចចិន ត្រូវប្រឈមមុខនឹងសម្ពាធ ៣ដង រួមមានការធ្លាក់ចុះនៃតម្រូវការ ហានិភ័យនៃការផ្គត់ផ្គង់ និងការរំពឹងទុកបន្តធ្លាក់ចុះ។

សម្រាប់ខែធ្នូ ការនាំចេញរបស់ចិន បានកើនឡើងយ៉ាងច្រើនស្របតាមការរំពឹងទុក រង្វង់ ២១% ទោះបីជាការនាំចូល មានកំណើនត្រឹម ១៩% ក៏ដោយ។ប្រធានសេដ្ឋវិទូនៅក្រុមហ៊ុន Pinpoint Asset Management បាននិយាយថា តួលេខនាំចេញរបស់ចិន នៅខែធ្នូ ក៏អាចឆ្លុះបញ្ចាំងពី ឥទ្ធិពលនៃមេរោគអូមីក្រុង ចំពោះខ្សែសង្វាក់ផ្គត់ផ្គង់ពិភពលោក ដោយការបញ្ជាទិញនាំចេញ បានផ្លាស់ប្តូរពីប្រទេសផ្សេងៗទៅកាន់ប្រទេសចិន។

លោកបានបន្ថែមថា បច្ចុប្បន្នការនាំចេញខ្លាំង អាចជាកត្តាជំរុញតែមួយគត់ដែលជួយសេដ្ឋកិច្ចរបស់ប្រទេសចិន។ការផ្ទុះឡើងចុងក្រោយបំផុត និងវិធានការរបស់រដ្ឋាភិបាលចិន បានគំរាមកំហែងដល់ការដោះស្រាយផលប៉ះពាល់បន្ថែមទៀតដល់សេដ្ឋកិច្ច បន្ទាប់ពីត្រូវបានវាយដំ ក្នុងរយៈពេល ៦ខែកន្លងមកនេះ។

កំណើនផលិតផលក្នុងស្រុកសរុបសម្រាប់ឆ្នាំ ២០២១ ត្រូវបានគេរំពឹងថា នឹងចូលមកក្នុងកម្រិត ៨% ទោះបីជាអ្នកវិភាគបានព្រមានអំពីឆ្នាំដ៏លំបាកខាងមុខ ដោយសារតែការធ្លាក់ចុះនៃវិស័យអចលនទ្រព្យ ក៏ដោយ។ជាចុងក្រោយ ដោយសារការបញ្ជាទិញថ្មី នៅតែទន់ខ្សោយ ហើយកំណើនតម្រូវការបរទេស បានធ្លាក់ចុះពីកម្រិតខ្ពស់បំផុតកាលពីឆ្នាំមុន ក្រុមហ៊ុន Oxford Economics បាននិយាយថា សន្ទុះនៃការនាំចេញ ត្រូវបានគេរំពឹងថា នឹងធូរស្រាលនៅឆ្នាំ ២០២២៕

អត្ថបទ៖ ងួន សុភ័ត្រ្តា និងរូបភាពឯកសារ