ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
អតីតសមាជិកបឹងកេត លោក យ៉ូប រ៉ូម៉ាតន ត្រូវបានសហព័ន្ធកីឡាបាល់ទាត់កម្ពុជា តាមរយៈនាយកបច្ចេកទេស Ohara Kazunori ជ្រើសតាំងជាគ្រូបង្គោលក្រុមបាល់ទាត់អាយុ ១៨ឆ្នាំ នៃសាលាបាល់ទាត់តម្រង់ទិសខេត្តកំពង់ចាម។
គ្រូបង្វឹកធ្លាប់ឈ្នះជើងឯកលីគកំពូល ២០១២ ជាមួយបឹងកេតឲ្យដឹងថា លោកមានក្ដីរីករាយជាពន់ពេកចំពោះការតែងតាំងនេះ ព្រោះបានសម្រេចនូវក្ដីប្រាថ្នាដ៏ធំមួយ គឺការចូលរួមបង្កើតធនធានកីឡាបាល់ទាត់ឲ្យកាន់តែសម្បូរបែប។
គួរដឹងដែរថា មុនឡើងទៅកាន់ U18 ខេត្តកំពង់ចាម លោក យ៉ូប រ៉ូម៉ាតន ធ្លាប់កាន់ក្រុម U15 តាំងពីខែមីនា ឆ្នាំ២០១៨មកម្ល៉េះ។ ងាកទៅអាជីពជាកីឡាករវិញ លោកធ្លាប់លេងឲ្យមហាគ្រុឌ គីរីវង់សុខសែនជ័យ ឆ្លាមសមុទ្រ និងបឹងកេត។ ស្នាដៃសម្រេចបានកន្លងមកជាមួយបឹងកេត គឺការឈ្នះជើងឯកលីគ ១លើក និងជើងឯករង ២លើក៕
អត្ថបទ៖ នីត
