សមាជិកក្រុមចម្រៀងខេប៉ុប Tomorrow X Together ឬហៅកាត់ថា TXT បានបង្ហាញអារម្មណ៍រំភើបខណៈពួកគេកំពុងចាប់ផ្ដើមការប្រគំតន្ត្រីទេសចរណ៍លើកដំបូងនៅអឺរ៉ុប ក្នុងសប្ដាហ៍នេះ បន្ទាប់ពីបានសម្រាកពីការងារទាំងអស់រយៈពេល២ខែកន្លងមក។

ផលិតកម្មរបស់ពួកគេគឺ Big Hit Music ដែលជាទ្រនំរបស់ក្រុម BTS ដែរបានប្រកាសកាលពីខែមករាថា TXT នឹងផ្អាកការងាររយៈពេលវែងដើម្បីសម្រាក និងចំណាយពេលជាមួយគ្រួសាររបស់ពួកគេ បន្ទាប់ពីប្រធានក្រុមគឺ Soobin បាននិយាយថាលោកត្រូវសម្រាកដោយហេតុផលសុខភាព។

នៅក្នុងបទសម្ភាសមួយ មុនពេលឡើងសម្ដែងលើឆាកនៃពហុកីឡដ្ឋាន O2 Arena ឯទីក្រុងឡុងដ៍ សម្រាប់ការសម្តែងលើកដំបូងរបស់ពួកគេនៅចក្រភពអង់គ្លេសនៅថ្ងៃអង្គារនេះ សមាជិក Hueningkai (ហ្យូនីងខៃ) បាននិយាយថានេះជាលើកទីមួយហើយដែលពួកគេបានសម្រាកការងាររយៈពេលយូរបែបនេះ ចាប់តាំងពីការបង្ហាញខ្លួនដំបូងក្នុងខែមីនា ឆ្នាំ ២០១៩។

រយៈពេល ៦ ឆ្នាំកន្លងមកនេះ សមាជិកទាំង ៥ បានកសាងភាពល្បីល្បាញយ៉ាងរឹងមាំជាមួយនឹងរសជាតិបទចម្រៀងបែបប៉ុបរ៉ុក ដោយមានបទល្បីៗដូចជា "Blue Hour", Sugar Rush Ride" និង "0X1=LOVESONG (You Know I love You)" ។

អាល់ប៊ុម "Minisode 3: Tomorrow" របស់ពួកគេបានជាប់ចំណាត់ថ្នាក់ជាអាល់ប៊ុមលក់ដាច់បំផុតទី ១០ ទូទាំងពិភពលោក ក្នុងឆ្នាំ ២០២៤ បើយោងតាមស្ថាប័នឧស្សាហកម្មតន្ត្រី IFPI។

ការប្រគំតន្ត្រីទេសចរណ៍អឺរ៉ុបរបស់ពួកគេបានចាប់ផ្ដើមនៅទីក្រុង Barcelona ប្រទេសអេស្ប៉ាញនៅថ្ងៃទី ២០ ខែមីនា រួចហើយនឹងបន្តទៅសម្ដែងទីក្រុងផ្សេងទៀតដូចជាទីក្រុងបែឡាំង ប្រទេសអាល្លឺម៉ង់ ទីក្រុងប៉ារីស ប្រទេសបារាំង និងទីក្រុងអាំស្ទែដាំ ប្រទសហូឡង់ ៕
 

ប្រែសម្រួល៖ វ៉ាន់ថន