ក្នុងរយៈពេល ១០ខែដើមឆ្នាំ ២០២៤នេះ វិនិយោគិនជប៉ុន ឈរនៅលំដាប់ទី ៧ នៃរំហូរទុនវិនិយោគសរុបនៅកម្ពុជា ដែលមានទុនវិនិយោគសរុបប្រមាណ ៤០លានដុល្លារអាមេរិក។ នេះបើយោងតាមរបាយការណ៍ពី ក្រុមប្រឹក្សាអភិវឌ្ឍន៍កម្ពុជា។

ក្រុមប្រឹក្សាអភិវឌ្ឍន៍កម្ពុជា បានឱ្យដឹងទៀតថា គិតចាប់ពីខែមករា ដល់ខែតុលា ឆ្នាំ ២០២៤នេះ ក្រុមប្រឹក្សាអភិវឌ្ឍន៍កម្ពុជា បានទាក់ទាញគម្រោងវិនិយោគសរុបប្រមាណ ៣៤៦គម្រោង គិតជាទឹកប្រាក់ជាង ៥ពាន់ ៥រយលានដុល្លារអាមេរិក មានការកើនឡើងប្រមាណ ៣៨% ធៀបនឹងពេលដូចគ្នា កាលពីឆ្នាំមុន។

ក្នុងនោះ នេះ វិនិយោគិនជប៉ុន ឈរនៅលំដាប់ទី ៧ នៃរំហូរទុនវិនិយោគសរុបនៅកម្ពុជា ដែលមានទុនវិនិយោគសរុបប្រមាណ ៤០លានដុល្លារអាមេរិក។តួលេខខាងលើនេះ ត្រូវបានបង្ហាញនៅក្នុងជំនួបផ្គូផ្គងធុរកិច្ចរវាងសមាគមឧកញ៉ាកម្ពុជា និងសមាគមជប៉ុន-កម្ពុជា ប្រចាំឆ្នាំ២០២៤ ដែលមានឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អញ្ជើញផ្តល់កិត្តិយសជាអធិបតីក្នុងជំនួបនេះ។

សូមរម្លឹកផងដែរថា ក្នុងខែតុលា ឆ្នាំ ២០២៤ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មីចំនួន ៣០គម្រោង និងគម្រោងពង្រីកផលិតកម្មចំនួន ១គម្រោង ដែលមានទុនវិនិយោគសរុបប្រមាណជាង ២២៦លានដុល្លារ និងអាចបង្កើតការងារបានប្រមាណ ១៦ពាន់កន្លែង ខណៈការវិនិយោគក្នុងស្រុក គ្របដណ្តប់ ២៩% នៃទុនវិនិយោគសរុប និងការវិនិយោគដោយសិង្ហបុរី មានចំណែក ១២%៕
 

អត្ថបទ៖ ងួន សុភ័ត្រ្តា រូបភាព៖ សុខ ពិសិដ្ឋ