រដ្ឋមន្ត្រីក្រសួងការបរទេសចិន នៅថ្ងៃព្រហស្បតិ៍(១២កញ្ញា) បានប្រកាសឱ្យដឹងថា លោក Xi Jinping ប្រធានាធិបតីចិន នឹងចូលរួមកិច្ចប្រជុំកំពូលBRICS នៅប្រទេសរុស្ស៊ីនៅខែក្រោយ។ 

កិច្ចប្រជុំកំពូលBRICS នឹងធ្វើឡើងចាប់ពីថ្ងៃ២២តុលា ដល់ថ្ងៃ២៤តុលានៅទីក្រុងKazan ប្រទេសរុស្ស៊ី។ នេះជាអ្វីដែលវិមានគ្រីមឡាំង សង្ឃឹមថា ជាឱកាសដើម្បីពង្រីកឥទ្ធិពល និងបង្កើតសម្ព័ន្ធភាពសេដ្ឋកិច្ចកាន់តែជិតស្និទ្ធ ជាពិសេសជាមួយទីក្រុងប៉េកាំង។

«លោកប្រធានាធិបតីXi ពិតជារីករាយទទួលយកការអញ្ជើញរបស់អ្នក ហើយនិងទៅដល់ទីក្រុងKazan តាមការគ្រោងទុក»។ លោករដ្ឋមន្ត្រីការបរទេសចិនWang Yi ថ្លែងប្រាប់លោកVladimir Putinប្រធានាធិបតីរុស្ស៊ីនៅកិច្ចប្រជុំក្នុងទីក្រុងSaint Petersburg។

លោកWang បន្តថា«ប្រមុខរដ្ឋទាំងពីរនឹងមានការពិភាក្សាយុទ្ធសាស្ត្របន្ថែមទៀត»។

រដ្ឋមន្ត្រីការបរទេសចិនរូបនេះក៏បានលើកឡើងផងដែរពី «ការជឿទុកចិត្តគ្នាទៅវិញទៅមកដ៏រឹងមាំ និងមិត្តភាពដ៏ជ្រាលជ្រៅរវាង លោក Putin និងលោក Xi»។

ក្រុមប្រទេសBRICS ជាអក្សរកាត់ សម្រាប់ប្រទេស ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង តំណាងឱ្យប្រជាជនស្ទើតែជិតពាក់កណ្តាលនៃចំនួនប្រជាជនពិភពលោក  ហើយបានពង្រីកខ្លួនភ្ជាប់ទៅប្រទេសផ្សេងទៀតមាន ប្រទេសអេមីរ៉ាត អារ៉ាប់រួម និងប្រទេសអ៊ឺរ៉ង់។ 
 

ប្រែសម្រួល៖ណាវ័ន្ត