ពិធីករលោក Summer បានចំណាយប្រាក់កាសយ៉ាងច្រើនដើម្បីសិក្សាភាសាអង់គ្លេសក៏ដូចជាជំនាញផ្សេងៗ រហូតបានក្លាយជាពិធីករល្បីម្នាក់ ប៉ុន្តែមុននឹងឈរជើងបានដូចសព្វថ្ងៃនេះលោកបានប្រឹងប្រែងសិក្សា រកលុយយ៉ាងលំបាក ដើម្បីបន្តតាមរកក្តីស្រមៃធំរបស់ខ្លួន ។  

ពិធីករវ័យក្មេងលោក Summer កាន់តែទទួលបានប្រជាប្រិយភាពខ្លាំងនៅក្នុងកម្មវិធី Miss Grand Cambodia 2024 កាលពីពេលថ្មីៗដោយលោកអាចនិយាយភាសា អង់គ្លេស បានយ៉ាងស្ទាត់ជំនាញ មិនចាញ់បរទេសឡើយ ។ ថ្មីៗនេះថែមទាំងមានលេចលឺព័ត៌មានថា ការប្រកួត Miss Grand International 2024 ដែលគ្រោងនឹងរៀបចំឡើងនៅក្នុងប្រទេស កម្ពុជា នាអំឡុង ខែ តុលា ខាងមុខនេះ អាចនឹងមានវត្តមានរបស់លោកចូលរួមផងដែរ ។ 

ជូបជាមួយលោក តារា ឧសភា ហៅ Summer កាលពីពេលថ្មីៗនេះលោកបានប្រាប់ថា លោកនៅពុំទាន់ដឹងថា ការប្រកួត Miss Grand International ដែលគ្រោងនឹងរៀបចំឡើងនៅក្នុងប្រទេស កម្ពុជា នោះ នឹងមានវត្តមានលោកឬយ៉ាងណាទេ ប៉ុន្តែបើខាងអ្នករៀបចំកម្មវិធីពេញចិត្តលោកចូលរួមធ្វើកម្មវិធីនោះ គឺជារឿងល្អបំផុត ។    Summer បានប្រលូកក្នុងអាជីពនេះអស់ពេលជាច្រើនឆ្នាំមកហើយ ប៉ុន្តែលោកចាប់ផ្តើមល្បីល្បាញខ្លាំងបន្ទាប់ពីមានវត្តមាននៅក្នុងការធ្វើពិធីករ Miss Grand Cambodia កាលឆ្នាំ ២០២៣ ហើយក្នុងឆ្នាំ ២០២៤ នេះលោកកាន់តែលេចធ្លោខ្លាំង បន្ទាប់ពីបានបញ្ចេញនូវសំនួនវោហារជាមួយនិងភាសា អង់គ្លេសយ៉ាងស្ទាត់ជំនាញ ។

 លោក  បានឱ្យដឹងថា មុននឹងក្លាយទៅជាពិធីករអាជីពដែលមានជំនាញខាងភាសា អង់គ្លេស នេះគឺលោកបានប្រឹងប្រែងសិក្សាភាសា អង់គ្លេស អស់លុយមិនតិចទេ ជីវិតលោកបានតស៊ូយ៉ាងលំបាកនៅលើវិថីមួយនេះ ។ 

លោក Summer បានប្តេជ្ញាចិត្ត ប្រឹងប្រែងពង្រឹងអាជីពពិធីករឱ្យកាន់តែខ្លាំងក្លាឡើង ដើម្បីក្លាយខ្លួនទៅជាពិធីករអាជីពដ៏ល្បីឈ្មោះទាំងក្នុងនិងក្រៅប្រទេស បើទោះបីជាពេលនេះលោកជោគជ័យក្នុងអាជីពនេះក៏ពិតមែន លោកនៅមានក្តីស្រមៃធំៗជាច្រើនទៀតដែលចង់ធ្វើ  ៕ 

អត្ថបទ ៖ ម៉ា រីសា រូបភាព ៖ អ៊ិន អាត