តុលាការធម្មនុញ្ញថៃ នៅថ្ងៃពុធ ៧សីហា នេះ បានបញ្ជាឱ្យរំលាយគណបក្ស Move Forward ពាក់ព័ន្ធនឹងយុទ្ធនាការដ៏ចម្រូងចម្រាស់របស់គណបក្សនយោបាយមួយនេះដែលចង់កែប្រែច្បាប់ការពារព្រះមហាក្សត្រពីការរិះគន់។

គណបក្ស Move Forward ជាគណបក្សប្រឆាំងដ៏មានប្រជាប្រិយភាពនៅប្រទេសថៃ។ ការរំលាយគណបក្ស ទំនងជាអាចឱ្យប្រជាជនថៃវ័យក្មេងនិងប្រជាជនថៃនៅទីក្រុងដែលគាំទ្រគណបក្ស Move Forward មានការខឹងសម្បារ ប៉ុន្តែផលប៉ះពាល់ពីសាលក្រមតុលាការមានកម្រិត ដែលគេឃើញថា ​មានតែអតីត​នាយក​ប្រតិបត្តិ​ និងបច្ចុប្បន្នរបស់គណបក្សនេះទាំង១១​រូប​​ប៉ុណ្ណោះ រួមទាំងអតីតមេដឹកនាំគណបកសលោក Pita Limjaroenrat ដែល​ត្រូវ​បាន​ហាម​មិនឱ្យ​ធ្វើ​នយោបាយ​រយៈពេល១០​ឆ្នាំ។

ចំណែកសមាជិកសភារបស់គណបក្សទាំង១៤៣ រំពឹងនឹងអាចរក្សាបានអាសនៈរបស់ពួកគេដដែល ហើយរំពឹងនឹងរៀបចំឡើងវិញជ្រកក្រោមឈ្មោះគណបក្សថ្មី៕

ប្រែសម្រួល៖ ណាវ័ន្ត