ខកខានក្នុងការសម្តែងអស់ពេលជាច្រើនឆ្នាំតារាសិច ឌុច លីដា បានបញ្ជាក់សារជាថ្មីថាបើត្រូវ ថ្លៃ ត្រូវសាច់រឿង នាងនឹងវិលត្រឡប់មកថតជាថ្មី មិនខ្វល់ថាតំណែងតួរង ឬតួឯកឡើយ ។ 

មិនមានវត្តមាននៅក្នុងភាពយន្តណាមួយអស់ពេលជាច្រើនឆ្នាំ តារាសម្តែងសិចស៊ី ឌុច លីដា បែរជាលេចមុខខ្លាំងក្នុងការងារជួយសមាគមសិល្បករខ្មែរនៅក្នុងអណត្តថ្មីនេះទៅវិញ ទោះបីជាខកខានសម្តែងក៏ពិតមែន ឌុច លីដា នៅតែអះអាងថា មិនបានបោះបង់សិល្បៈចោលឡើយ បើត្រូវសាច់រឿង ត្រូវថ្លៃ នាងនឹងទទួលថតឡើងវិញ ។

តារាសម្តែងរូបនេះ ធ្លាប់លេចមុខភាពយន្តធំៗជាច្រើន ប៉ុន្តែចាប់តាំងពីនាងសម្រេចចិត្តសាងគ្រួសារនាងបានបាត់មុខពីឆាកសម្តែងទាំងស្រុង បើទោះបីជាពេលនេះកូនប្រុសរបស់នាងមានវ័យជិត ៦ ឆ្នាំក្តី នាងនៅពុំទាន់វិលត្រឡប់ចូលសិល្បៈវិញ រហូតធ្វើឱ្យមហាជនជាច្រើនគិតថា នាងឈប់ពីសិល្បៈហើយ ។ 

ដោយឡែកជួបជាមួយតារាសម្តែងធ្លាប់មានឈ្មោះល្បីខាងលើ នៅក្នុងពិធីសម្ពោធរឿង « ប្រវត្តិស្នេហ៍នាងនាថ » កាលពីពេលថ្មីៗនេះនាងបានបញ្ជាក់ប្រាប់ថា នាងនៅតែនឹករលឹកវិស័យសម្តែងដែលធ្វើឱ្យនាងមានមុខមាត់ដូចសព្វថ្ងៃនេះ ទោះបីជាអាក់ខានក្នុងវិស័យនេះ អស់ពេលជាច្រើនឆ្នាំ នាងនៅតែស្រឡាញ់ និងចង់បន្តអាជីពនេះតទៅមុខទៀត ប្រសិនបើចចារត្រូវថ្លៃ និង ត្រូវសាច់រឿង នាងនៅតែទទួលថតដូចដើម ។  

ចូលវ័យនេះតារាសម្តែង ឌុច លីដា មានអារម្មណ៍ថា ខ្លួនចាស់ជាងមុនច្រើន ហើយនាងក៏មិនប្រាថ្នាតំណែងតួឯកធំដូចមុនដែរ ផ្ទុយទៅវិញនាងបែរជាសរសើរតារាសម្តែងវ័យក្មេងស្រករក្រោយថា ម្នាក់ៗសុទ្ធតែខ្លាំងៗ និងមានសមត្ថភាពខ្ពស់ ។  

តារាសម្តែង ឌុច លីដា នៅពុំទាន់មានគម្រោងយកកូនទី ២ នៅឡើយទេ ហើយនាងក៏មិនទាន់មានគម្រោងដើម្បីរៀបចំពិធីមង្គលការដែលមានលក្ខណៈធំដុំ ដូចអ្វីដែលខ្លួនធ្លាប់បាននិយាយដែរ ផ្ទុយទៅវិញនាងបានទុករឿងនេះមួយឡែក ដើម្បីធ្វើការងារដែលខ្លួនស្រឡាញ់ ៕

អត្ថបទ ៖ ម៉ា រីសា  រូបភាព ៖ ឃាង ទូច