សមាគមអ្នកនាំចេញ និងផលិតអាហារសមុទ្រវៀតណាម បានឱ្យដឹងថា ប្រទេសវៀតណាម រកចំណូលបានជាង ៥ពាន់ ២រយលានដុល្លារអាមេរិកពី ការនាំចេញផលិតផលជលផល ក្នុងរយៈពេល ៧ ខែដំបូងឆ្នាំ ២០២៤ កើនឡើង ៧% ធៀបនឹងពេលដូចគ្នាកាលពីឆ្នាំមុន។ នេះបើតាមការចេញផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។

សមាគម បន្តថា ក្នុងខែកក្កដា ការនាំចេញផលិតផលជលផលរបស់វៀតណាម បានឈានដល់ ៨៨៥លានដុល្លារអាមេរិក កើនឡើង ១៤% ដោយការនាំចេញត្រីធូណា ត្រីប្រា បង្គាជាដើម សុទ្ធតែមានកំណើនវិជ្ជមាន បើធៀបនឹងរយៈពេលដូចគ្នា កាលពីឆ្នាំមុន។

ក្នុងរយៈពេល ៧ខែនេះ ការនាំចេញបង្គា ទទួលបានចំណូល ២ពាន់លានដុល្លារអាមេរិក ហើយការនាំចេញត្រីប្រា សម្រេចបាន ១ពាន់លានដុល្លារ និងត្រីធូណា សម្រេចបានជាង ៥៥០លានដុល្លារអាមេរិក។

ការនាំចេញទៅកាន់ ទីផ្សារធំៗចំនួន ៤ បានស្ទុះងើបឡើងវិញ ដោយក្នុងរយៈពេល ៧ខែនេះ ការនាំចេញទៅកាន់សហរដ្ឋអាមេរិក សហភាពអឺរ៉ុប និងចិន មានកំណើន ១០% ដូចៗគ្នា ខណៈការនាំចេញទៅកាន់ កូរ៉េខាងត្បូង កើនឡើង ១%។

សហរដ្ឋអាមេរិក និងសហភាពអឺរ៉ុប ត្រូវបានគេរំពឹងថា នឹងក្លាយជាទីផ្សារដ៏មានសក្តានុពលសម្រាប់ផលិតផលកក ក្នុងឆមាសទី ២ ដោយមើលឃើញពី សញ្ញាវិជ្ជមាននៃការងើបឡើងវិញនៃសេដ្ឋកិច្ច ការបន្ធូរបន្ថយអតិផរណា និងអត្រាការប្រាក់នៅថេរ។

សូមជម្រាបថា សមាគមអ្នកនាំចេញ និងផលិតអាហារសមុទ្រវៀតណាម បានអះអាងថា ការនាំចេញអាហារសមុទ្រសរុបសម្រាប់ឆ្នាំ ២០២៤ រំពឹងសម្រេចបានប្រហែល ៩ពាន់ ៥រយលានដុល្លារអាមេរិក ទោះបីជាមានការប្រឈមមុខនិងបញ្ហាជាច្រើនក្តី៕

អត្ថបទ៖ ងួន សុភ័ត្រ្តា រូបភាព៖ ឯកសារ