ក្រុមហ៊ុនផលិតរថយន្តអគ្គិសនីរបស់ប្រទេសចិន ដែលមានឈ្មោះថា GAC Aion ដែលជាក្រុមហ៊ុនបុត្រសម្ព័ន្ធរបស់ GAC Group បានបើករោងចក្រដំបូងរបស់ខ្លួននៅក្នុងប្រទេសថៃ ដែលជាមជ្ឈមណ្ឌលនាំចេញ និងដំឡើងរថយន្តក្នុងតំបន់ដ៏សំខាន់។ នេះបើយោងតាម សារព័ត៌មានក្នុងស្រុកថៃ ចេញផ្សាយនៅថ្ងៃនេះ។

ប្រធាន GAC Group បានថ្លែងនៅក្នុងពិធីសម្ពោធរោងចក្រនៅឯ តំបន់ឧស្សាហកម្មក្នុងខេត្ត រ៉ាយ៉ុង ថា ក្រុមហ៊ុននឹងគាំទ្រដល់ការផលិតរថយន្តអគ្គិសនី របស់ប្រទេសថៃ និងលើកកម្ពស់ប្រទេសថៃជាមជ្ឈមណ្ឌលឧស្សាហកម្មរថយន្តអគ្គិសនីនៅអាស៊ីអាគ្នេយ៍។

ជាក់ស្តែង ប្រទេសថៃ ជាមជ្ឈមណ្ឌលផលិតរថយន្តក្នុងតំបន់អស់ជាច្រើនទសវត្សរ៍មកហើយ ដែលគ្រប់គ្រងដោយអ្នកផលិតជប៉ុនដូចជា Toyota Motor និង Isuzu Motor។

ប៉ុន្តែរលកនៃក្រុមហ៊ុនផលិតរថយន្តអគ្គិសនីរបស់ចិន កំពុងឈានចូលទីផ្សារយ៉ាងគំហុក ជាមួយនឹងការវិនិយោគជាង ១ពាន់ ៤រយលានដុល្លារអាមេរិក ដែលប្រកួតប្រជែងជាមួយក្រុមហ៊ុនជប៉ុន ខណៈដែលអ្នកប្រើប្រាស់ថៃ ក៏បាននិងកំពុងប្រើប្រាស់រថយន្តអគ្គិសនីយ៉ាងឆាប់រហ័សផងដែរ ដោយសារការឧបត្ថម្ភធនរបស់រាជរដ្ឋាភិបាល និងការលើកទឹកចិត្តផ្នែកពន្ធ។

រាជរដ្ឋាភិបាលថៃ ក៏មានគោលដៅចង់បាន ផលិតកម្មរថយន្តអគ្គិសនី ស្មើនឹង ៣០% នៃរថយន្តចំនួន ២លាន ៥សែនគ្រឿងរបស់ខ្លួន ដែលផលិតជារៀងរាល់ឆ្នាំ នៅត្រឹមឆ្នាំ ២០៣០។សូមជម្រាបថា រដ្ឋមន្ត្រីឧស្សាហកម្មថៃ បានបញ្ជាក់ថា រោងចក្រតម្លៃ ៦៤លានដុល្លារអាមេរិករបស់ GAC Aion នឹងអាចផលិតរថយន្តបាន ៥ម៉ឺនគ្រឿងក្នុងមួយឆ្នាំ៕
 

អត្ថបទ៖ ងួន សុភ័ត្រ្តា រូបភាព៖ ឯកសារ