ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
ក្រុមមន្ត្រីបាននិយាយកាលពីថ្ងៃអាទិត្យថា មនុស្សយ៉ាងតិច ១២៥ នាក់បានស្លាប់ និង ១៨០ នាក់ទៀតបានរងរបួសនៅក្នុងការរត់ជាន់គ្នានិងកុបកម្មនៅការប្រកួតបាល់ទាត់មួយក្នុងប្រទេសឥណ្ឌូនេស៊ីជាគ្រោះមហន្តរាយនៅកីឡដ្ឋានដ៏អាក្រក់បំផុតមួយនៅក្នុងពិភពលោក។
ស្នងការប៉ូលិសខេត្តចាវ៉ាខាងកើតគឺលោក នីកូ អាហ្វីនតា បានប្រាប់អ្នកព័ត៌មានថា ពេលដែលក្រុមអ្នកគាំទ្រក្រុមម្ចាស់ផ្ទះបានខកចិត្តចំពោះការចាញ់ក្រុមក្រៅទឹកដីហើយពួកគេបានសម្រុកចូលក្នុងទីលានប្រកួតនៅក្នុងទីក្រុងម៉ាឡាងក្នុងខេត្តនេះកាលពីល្ងាចថ្ងៃសៅរ៍។
ក្រុមសន្តិសុខបានបាញ់ឧស្ម័នបង្ហូរទឹកភ្នែកដើម្បីគ្រប់គ្រងស្ថានការណ៍បណ្ដាលឱ្យមានការរត់ជាន់គ្នា ការឈ្លក់ផ្សែងឧស្ម័ន និងកុបកម្មស្លាប់មនុស្សយ៉ាងតិច ១២៥ នាក់រួមទាំងក្មេងម្នាក់ផងដែរ និង១៨០នាក់ទៀតរងរបួសតែម្ដង។
ប្រធានាធិបតីឥណ្ឌូនេស៊ីលោក ចូកូ វីដូដូ បាននិយាយថា អាជ្ញាធរត្រូវតែវាយតម្លៃឱ្យបានហ្មត់ចត់ពីសុវត្ថិភាពនៅក្នុងការប្រកួតដោយលោកសង្ឃឹមថា នេះនឹងក្លាយជា«សោកនាដកម្មបាល់ទាត់ចុងក្រោយបំផុតនៅក្នុងប្រទេសនេះទៅចុះ ហើយលោកក៏បានបញ្ជាឱ្យផ្អាកការប្រកួតបាល់ទាត់ទាំងអស់ផងដែរ៕
ប្រែសម្រួល៖ ប៉ិច ស៊ីនួន
