ស្ត្រីម្នាក់ជួយចិញ្ចឹមសត្វឆ្មារាប់សិបក្បាលក្នុងទីក្រុងមួយដែលរងការវាយប្រហារនៅអ៊ុយក្រែន

ស្ត្រីម្នាក់ឈ្មោះ Natalia Pasternak មានចិត្តអាណិតអាសូរចំពោះសត្វដោយបានជួយចិញ្ចឹមសត្វឆ្មារាប់សិបក្បាលដែលត្រូវបានម្ចាស់របស់វាបោះបង់ចោលដោយសារពួកគេរត់គេចពីការឈ្លានពានរបស់រុស្ស៊ីទៅលើអ៊ុយក្រែន។

រៀងរាល់ព្រឹកចាប់តាំងពីសង្គ្រាមចាប់ផ្តើមឡើងនៅអ៊ុយក្រែន អ្នកស្រី Natalia ដែលចូលនិវត្តន៍ហើយនោះបានដើរជុំវិញអគារដែលរងការទម្លាក់គ្រាប់បែកនៅក្នុងសង្កាត់របស់អ្នកស្រីស្ថិតនៅភាគឦសានប្រទេសអ៊ុយក្រែនដោយយកអាហារឱ្យសត្វឆ្មាដែលភាគច្រើនត្រូវបានម្ចាស់របស់វាបោះបង់ចោល។

អ្នកស្រីបានប៉ាន់ប្រមាណថា មានសត្វឆ្មានិងកូនឆ្មារហូតដល់ ១០០ ក្បាលនៅក្នុងបរិវេណអគាររបស់អ្នកស្រីនៅក្នុងសង្កាត់ North Saltivka ក្នុងទីក្រុងខាគីវដែលនៅមុនពេលសង្គ្រោះនេះបានផ្ទុះឡើងគឺមានចំនួនមនុស្សរស់នៅក្នុងសង្កាត់នោះប្រហែល ៣០ ម៉ឺននាក់។

សត្វឆ្មាមួយចំនួនដែលអ្នកស្រី Natalia ជួយចិញ្ចឹមគឺជាការស្នើសុំរបស់ម្ចាស់របស់វា ហើយក៏មានខ្លះទៀតត្រូវបានម្ចាស់បោះបង់ចោលនៅក្នុងអគារដែលរងការវាយប្រហារខូចខាតនេះផងដែរ។ ស្ត្រីដែលជាប់ងារជា«សុភាពនារីឆ្មា»អាយុ ៦៨ ឆ្នាំនេះបាននិយាយ ពួកវាគ្មានទីពឹងនោះទេដូច្នេះហើយនៅពេលគេបោះបង់ចោលគឺគ្មានអាហារស៊ីនោះទេ។

ដើម្បីមានលទ្ធភាពទិញអាហារសម្រាប់ឆ្មាទាំងនេះ គឺអ្នកស្រីបានធ្វើការងារចម្លែកៗដូចជាស៊ីឈ្មួលជួសជុលសម្លៀកបំពាក់ ហើយម្យ៉ាងទៀតដើរសុំជំនួយពីអ្នកស្ម័គ្រចិត្ត និងសាច់ញាតិរបស់សត្វឆ្មា។

អ្នកស្រី Natalia ដែលរស់តែម្នាក់ឯងនៅក្នុងអគាររបស់អ្នកស្រីនោះបានរួមរស់ជាមួយសត្វឆ្មារាប់សិបក្បាលដោយយកពួកវាធ្វើជាសមាជិកគ្រួសាររបស់គាត់ ហើយគាត់បាននិយាយថា គាត់មិនត្រូវការអ្វីផ្សេងទៀតនោះទេព្រោះគេបានយល់គ្រប់យ៉ាងទៅហើយ៕

ប្រែសម្រួល៖ ប៉ិច ស៊ីនួន

ព័ត៌មានដែលទាក់ទង

ព័ត៌មានអន្តរជាតិ