សហរដ្ឋអាមេរិកកាលពីសប្តាហ៍កន្លងទៅ បានប្រកាសដាក់ជំងឺអុតស្វាជាភាពអាសន្នសុខភាពសាធារណៈសាកលដែលនេះជាកិច្ចខិតខំប្រឹងប្រែងមួយរបស់ សហរដ្ឋអាមេរិក ដើម្បីពង្រឹងការឆ្លើយតបរបស់សហរដ្ឋអាមេរិកក្នុងការទប់ស្កាត់ជំងឺឆ្លងអុតស្វា ឬ(Monkey Pox)។

វីរុសជំងឺអុតស្វា ឬ(Monkey Pox) បន្តជាជំងឺឆ្លងខ្លាំងជាពិសេសនៅក្នុងចំណោមក្រុមបុរសស្រឡាញ់ភេទដូចគ្នា ឬក្រុមបុរសស្រឡាញ់ទាំងបុរសនិងស្ត្រី ប៉ុន្តែក្រុមអ្នកជំនាញក៏បានព្រមានថា ជំងឺអុតស្វាអាចឆ្លងរាលដាលទៅពលរដ្ឋផ្សេងទៀត ជាពិសេសដោយសារបញ្ហាកង្វះវ៉ាក់ស៊ាំង។

នៅទីក្រុងប៉ារីស ប្រទេសបារាំង ពលរដ្ឋឈរតម្រង់ជួរគ្នា ដើម្បីចាក់វ៉ាក់ស៊ាំងជំងឺអុតស្វានៅមជ្ឈមណ្ឌលចាក់វ៉ាក់ស៊ាំងថ្មី។ វ៉ាក់ស៊ាំង ត្រូវបានកក់ទុកអស់នៅ២ថ្ងៃដំបូង ចាប់តាំងពីមជ្ឈមណ្ឌលបើកចាក់វ៉ាក់ស៊ាំងជំងឺអុតស្វា។

នៅទូទាំងប្រទេសបារាំង មានអ្នកជំងឺអុតស្វាច្រើនជាង១៨០០នាក់ ដែលភាគច្រើនអ្នកជំងឺស្ថិតនៅទីក្រុងប៉ារីស។ បើគិតជាសាកល ប្រទេសបារាំង មានអ្នកជំងឺអុតស្វាប្រហែល១០ភាគរយនៃតួលេខអ្នកជំងឺសរុបនៅទូទាំងពិភពលោក។

លោក Maxime ជាសិស្សសាលាអាយុ២៧ឆ្នាំនៅទីក្រុងប៉ារីស បានលើកឡើងយ៉ាងដូច្នេះ« ប្រសិនបើយើងអាចជៀសពីជំងឺឆ្លងបាន ហើយបើអាចមិនឆ្លងជំងឺឆ្លង ជាលើកទី២បន្ទាប់ពីជំងឺកូវីដ១៩ ដូច្នេះជម្រើសចាក់វ៉ាក់ស៊ាំងជាជម្រើសល្អ»។ និស្សិតរូបនេះបន្តថា លោកបារម្ភចំពោះក្រុមមនុស្សដែលងាយឆ្លងជំងឺអុតស្វា។

នៅប៉ុន្មានសប្តាហ៍ចុងក្រោយនេះ មជ្ឈមណ្ឌលចាក់វ៉ាក់ស៊ាំងច្រើនជាង១០០កន្លែង ត្រូវបានបើកដំណើរការទូទាំងប្រទេសបារាំង ហើយមនុស្សច្រើនជាង៦ពាន់នាក់ បានចាក់វ៉ាក់ស៊ាំងជំងឺអុតស្វាបាន១ដូស។

ប្រែសម្រួល៖ណាវ័ន្ត