ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
ការសម្ដែងរបស់ក្រុមចម្រៀងនារី Girls' Generation (ហ្គើលស័ ជេនេរ៉េសិន) សម្រាប់ការ Comeback អបអរខួប១៥ឆ្នាំរបស់ពួកគេក្នុងសប្ដាហ៍នេះ ត្រូវបានរំសាយចោលក្រោយពីមានសមាជិកក្រុមបានឆ្លងជំងឺកូវីដ១៩។
ផលិតកម្មយក្សកូរ៉េ SM (អេសអឹម) បានប្រកាសថាការសម្ដែងរបស់ក្រុមចម្រៀងនារី Girls' Generation (ហ្គើលស៍ ជេនេរ៉េសិន) លើឆាកតន្ត្រីតាមប៉ុស្តិ៍ទូរទស្សន៍ទាំងអស់នាសប្ដាហ៍នេះត្រូវបានរំសាយចោល ដោយសារសមាជិកឈ្មោះ Seohyun (ស៊ូយ៉ុន) បានឆ្លងជំងឺកូវីដ១៩។
យ៉ាងណាមិញ ផលិតកម្មខាងលើបានបញ្ជាក់ថាការឡើងសម្ដែងជុំគ្នារបស់ Girls' Generation's នឹងត្រូវលើកពេលទៅពេលក្រោយជាបន្តបន្ទាប់ដោយមិនបានរំសាយចោលទាំងស្រុងឡើយ។ បន្ថែមពីនេះសមាជិកឈ្មោះ Seohyun (ស៊ូយ៉ុន) ក៏បានបង្ហោះសារសូមទោសដល់អ្នកគាំទ្រ និងសមាជិកក្រុមរបស់ខ្លួនផងដែរ ដោយនាងសង្ឃឹមថានឹងអាចឆាប់ជាសះស្បើយដើម្បីអាចបានឡើងសម្ដែងនៅសប្ដាហ៍ក្រោយតែម្ដង។
បន្ទាប់ពីមានការប្រកាសដំណឹងអំពីការរំសាយចោលការសម្ដែងសប្ដាហ៍នេះ អ្នកគាំទ្ររបស់ក្រុមចម្រៀង Girls' Generation's(ហ្គើលស័ ជេនេរ៉េសិន) ទាំងអស់បានសម្ដែងការសោកស្ដាយជាខ្លាំង ព្រោះថាការសម្ដែងរបស់ក្រុមនារីមួយនេះជាអ្វីដែលពួកគេបានទន្ទឹងរង់ចាំអស់ជាច្រើនឆ្នាំមកហើយ។
សូមរំលឹកថាក្រុមនារី Girls' Generation's(ហ្គើលស័ ជេនេរ៉េសិន) ទើបតែចេញផ្សាយអាល់ប៊ុមចម្រៀងជុំគ្នាជាលើកដំបូងក្នុងរយៈពេល៥ឆ្នាំ ដើម្បីអបអរសាទរដល់ខួបទី១៥ឆ្នាំនៃការបង្កើតក្រុមពួកគេ ដោយមានបទចម្រៀង "Forever 1" (ហ្វ័ររ៉េវើ វ័ន) ជាបទចម្រៀងនាំមុខ ៕
ប្រែសម្រួល៖ វ៉ាន់ថន