ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
បន្ទាប់ពីទទួលបានជោគជ័យពីររដូវកាលជាប់គ្នា ពេលនេះភាពយន្តភាគ "The Umbrella Academy" (ដឺ អាំប្រ៊េឡា អាខេតដឺមី) បានវិលត្រឡប់ជាមួយរដូវកាលថ្មី ដែលមានចាក់បញ្ចាំងចាប់ពីសប្ដាហ៍នេះតទៅ។
រឿងភាគបែបស៊ុបពើហេរូដ៏ល្បីរបស់ Netflix (ណិតផ្លិច) មានចំណងជើងថា "The Umbrella Academy" (ដឺ អាំប្រ៊េឡា អាខេតដឺមី) បានវិលត្រឡប់ជាមួយរដូវកាលទីបី ដែលមានបង្ហាញពីក្រុមតួអង្គថ្មីឈ្មោះថាក្រុម Sparrow Academy (ស្ពែរ៉ូ អាខេតដឺមី)។
រដូវកាលថ្មីនេះក៏មានបង្ហាញពីការផ្លាស់ប្ដូររបស់តួអង្គ Vanya (វ៉ានយ៉ា) ទៅជាតួអង្គឈ្មោះ Viktor (វីកទ៊័រ) ដែលដូចគ្នាទៅនឹងជីវិតពិតរបស់តារាសម្ដែង Elliot Page (អេលៀត ផេច) ដែលសម្ដែងជាតួអង្គទាំងពីរ។
លោក Steve Blackman (ស្ទីវ ប្លេកម៉េន) អ្នកបង្កើតភាពយន្តភាគនេះបាននិយាយថាលោកបានធ្វើការយ៉ាងជិតស្និទ្ធជាមួយតារាសម្ដែង Elliot Page (អេលៀត ផេច) បន្ទាប់ពីតារាសម្ដែងរូបនេះបានប្រកាសកាលពីចុងឆ្នាំ២០២០ ថារូបគេជាបុរសកែភេទ និងបានផ្លាស់ប្ដូរឈ្មោះរបស់ខ្លួន។
សូមរំលឹកថារដូវកាលពីទីពីរនៃភាពយន្តភាគនេះ បានបិទបញ្ចប់ដោយក្រុមបងប្អូននៃ "The Umbrella Academy" (ដឺ អាំប្រ៊េឡា អាខេតដឺមី) បានបញ្ឈប់ហេតុការណ៍អវសាន្តពិភពលោកក្នុងឆ្នាំ១៩៦៣ រួចបានវិលត្រឡប់មកកាន់ពេលវេលាបច្ចុប្បន្នវិញដើម្បីស្វែងរកខ្លួនឯងក្នុងពេលវេលាដទៃ ហើយពេលនោះដែរផ្ទះរបស់ ក្រុមបងប្អូននៃ "The Umbrella Academy" (ដឺ អាំប្រ៊េឡា អាខេតដឺមី) ត្រូវបានកាន់កាប់ដោយក្រុមបងប្អូននៃ Sparrow Academy (ស្ពែរ៉ូ អាខេតដឺមី)។
ភាពយន្តភាគ "The Umbrella Academy" (ដឺ អាំប្រ៊េឡា អាខេតដឺមី) បានផលិតឡើងដោយផ្អែកតាមសៀវភៅត្លុកមួយប្រភេទ ហើយភាពយន្តភាគនេះបានទទួលបានការគាំទ្រខ្លាំងពីសំណាក់ទស្សនិកជន ដោយសារតែមានបង្ហាញពីរឿងរ៉ាវលំបាកក្នុងគ្រួសារ និងធាតុពិតនៃជីវិតជាច្រើនចំណុច៕
ប្រែសម្រួល៖វ៉ាន់ថន