ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
ស្របពេលលេចមុខក្នុងកម្មវិធី « អ្នកជិតខាង » របស់ទូរទស្សន៍ ភីអិនអិន មើលទៅតារាចម្រៀង កែវ វាសនា ដូចជាមានអារម្មណ៍ប្លែកនៅពេលនិយាយដល់វិស័យចម្រៀងដែលជាអាជីពរបស់ខ្លួន។
មួយរយៈពេលចុងក្រោយនេះតារាចម្រៀងលោក កែវ វាសនា មិនសូវលេចមុខនៅឆាកតន្រ្តី ដូចកាលពីមុនឡើយ ផ្ទុយទៅវិញលោកបែរជាលេចមុខខ្លាំងជាមួយមុខជំនួញជាច្រើនជាមួយភរិយាខ្លួនទៅវិញ រហូតធ្វើឱ្យទស្សនិកជនជាច្រើនគិតថា តារាចម្រៀងរូបនេះមិនចង់សន្សំប្រាក់កាក់ល្អិតពីវិស័យនេះទៀតនោះទេ ។
ទោះជាយ៉ាងនេះក្តីជួបជាមួយតារាចម្រៀងរាងតូចច្រឡឹងរូបនេះ នៅក្នុងកម្មវិធី « អ្នកជិតខាង » របស់ទូរទស្សន៍ ភីអិនអិន កាលពីពេលថ្មីៗលោកបានបញ្ជាក់ថា លោកនៅតែស្រឡាញ់ សិល្បៈ តែបើការងារនេះមិនរលូនដូចមុន លោកអាចនឹងងាកមកពង្រឹងមុខជំនួញជាមួយភរិយាវិញ ។
នេះជាលើកដំបូងហើយសម្រាប់តារាចម្រៀង កែវ វាសនា បានចូលរួមក្នុងកម្មវិធីកម្សាន្តដែលមានឈ្មោះថា « អ្នកជិតខាង » លោកបានបង្ហាញពីចំណាប់អារម្មណ៍របស់ខ្លួនថា ដោយសារការងារមមាញឹកលោកកម្រនឹងបង្ហាញមុខនៅក្នុងកម្មវិធីកម្សាន្តណាមួយណាស់ ថ្ងៃនេះលោកពិតជាសប្បាយចិត្តណាស់ដែលមានឱកាសបានចូលរួមកម្មវិធី « អ្នកជិតខាង » របស់ទូរទស្សន៍ ភីអិនអិន ។
ឆាប់ៗខាងមុខនេះកម្មវិធី « អ្នកជិតខាង » ត្រៀមនឹងពង្រើកឆាកកាន់តែធំជាងមុនជាមួយនិងការដេគ័រឆាកថ្មី ប្លែកភ្នែក ហើយក៏បន្ថែមនូវតារាកំប្លែងថ្មីៗជាច្រើនរូបទៀត ដើម្បីធ្វើឱ្យកម្មវិធីកាន់តែមានការចាប់អារម្មណ៍ខ្លាំង ជាពិសេសនឹងមានអ្វីប្លែកៗជាច្រើនទៀតត្រៀមនឹងបង្ហាញទស្សនិកជនក្នុងពេលឆាប់ខាងមុខ ។ នេះបើតាមការបញ្ចាក់ពីអ្នកផលិតកម្មវិធី”អ្នកជិតខាង”។
គួររំលឹកផងដែរថា លោក កែវ វាសនា ជាតារាចម្រៀងល្បីមួយរូបប្រចាំនៅក្នុងផលិតកម្ម សាន់ដេ ថ្មីៗនេះលោកបានចេញបទចម្រៀងថ្មីមួយដែលមានចំណងជើងថា « បើអស់ចិត្ត » ទទួលបានការគាំទ្រ យ៉ាងច្រើនពីសំណាក់ទស្សនិកជនទាំងនៅទីក្រុង និងតាមបណ្តាខេត្តនានា ឆាប់ៗខាងមុខនេះលោកក៏ ត្រៀមនឹងចេញបទចម្រៀងថ្មីដើម្បីអង្រួញអារម្មណ៍ទស្សនិកជនផងដែរ ៕
អត្ថបទ ៖ ម៉ា រីសា រូបភាព ៖ ហ៊ុន សុជាតា