ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
ប្រទេសអង់គ្លេស នឹងមិនដើរចេញពីពលរដ្ឋទីក្រុងហុងកុងឡើយ ប្រសិនបើប្រទេសចិន អនុវត្តន៍ច្បាប់សន្តិសុខជាតិលើទីក្រុងហុងកុង។ ការអនុវត្តន៍ ច្បាប់សន្តិសុខជាតិរបស់រដ្ឋាភិបាលទីក្រុងប៉េកាំង ជាការប៉ះពាល់ដល់កាត្វព្វកិច្ចអន្តរជាតិរបស់រដ្ឋាភិបាលទីក្រុងប៉េកាំងក្រោមកិច្ចព្រមព្រៀងឆ្នាំ១៩៨៤។ នេះជាការលើកឡើងរបស់នាយករដ្ឋមន្ត្រីអង់គ្លេស Boris Johnson នៅថ្ងៃពុធនេះ។
នាយករដ្ឋមន្ត្រីអង់គ្លេសលោកJohnson បានថ្លែងថា ពលរដ្ឋជាច្រើននៅក្នុងទីក្រុងហុងកុង បារម្ភថា ជីវិតរស់នៅប្រចាំថ្ងៃរបស់ពួកគេ ស្ថិតនៅក្រោមការគំរាមកំហែង នៅពេលប្រទេសចិនអនុវត្តន៍ ច្បាប់សន្តិសុខជាតិនៅក្នុងទីក្រុងហុងកុង។
សភាប្រទេសចិនកាលពីសប្តាហ៍មុន បានអនុម័ត្តសេចក្តីសម្រេចបង្កើតច្បាប់សម្រាប់ទីក្រុងហុងកុងដើម្បីលុបបំបាត់អំពើបេះបោរ ការបំបែករដ្ឋ ភេរវកម្ម និងការជ្រៀតជ្រែកពីបរទេស។
នាយករដ្ឋមន្ត្រីអង់គ្លេស លោក Boris Johnson បានលើកឡើងជាថ្មីម្តងទៀត នូវការសន្យារបស់ប្រទេសអង់គ្លេសដែលថានឹងផ្តល់អោយពលរដ្ឋហុងកុងកាន់លិខិតឆ្លងដែនBNO នូវច្រកផ្លូវមួយអាចទទួលបានសញ្ជាតិអង់គ្លេស ដែលអាចអោយពលរដ្ឋទីក្រុងហុងកុង អាចតាំងលំនៅនៅក្នុងអង់គ្លេសបាន បន្ថែមទៅលើសិទ្ធិដែលអ្នកកាន់លិខិតឆ្លងដែនBNO មាននាពេលបច្ចុប្បន្ន។
ប្រែសម្រួលដោយ៖ ទួត ណាវ័ន្ត
