ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន អមដំណើរដោយប្រតិភូក្រសួងដែលរួមមានមន្ត្រីរដ្ឋបាល មន្ត្រីហិរញ្ញវត្ថុ និងមន្ត្រីបច្ចេកទេសសរុបជាង ២០នាក់ នៅថ្ងៃទី៣ ខែមិថុនានេះ បានអញ្ជើញទស្សនកិច្ចស្ថានីយទូរទស្សន៍ភីអិនអិន ដែលមានទីតាំងស្ថិតនៅភូមិ ព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។ វត្តមានរបស់ឯកឧត្តមរដ្ឋមន្ត្រីនិងគណៈប្រតិភូបានទទួលការស្វាគមន៍យ៉ាងកក់ក្តៅពីសំណាក់ថ្នាក់ដឹកនាំនិងបុគ្គលិកស្ថានីយទូរទសសន៍ ភីអិនអិន។
ដំណើរទស្សនកិច្ចរបស់ ឯកឧត្តម ខៀវ កាញារីទ្ធ គឺដើម្បីស្វែងយល់ដោយផ្ទាល់ពីដំណើការការងារ និងស្ថានីយផ្សាយបែបឌីជីថលដ៏ទំនើបៗ លំដាប់អន្តរជាតិ និងធំជាង គេបង្អស់នៅកម្ពុជា។
ថ្នាក់ដឹកនាំស្ថានីយទូរទស្សន៍ ភីអិនអិន បាននាំគណៈប្រតិភូទស្សនាទីតាំងសំខាន់ៗ នៅក្នុងស្ថានីយមានដូចជា បន្ទប់បច្ចេកទេសបំពាក់ដោយឧបករណ៍ទំនើបៗចុងក្រោយ បន្ទប់កាត់តសម្លេង បន្ទប់បញ្ចូលសម្លេង បន្ទប់ថតកម្មវិធី ស្ទីឌីយោ កន្លែងបញ្ចូលសំឡេងភាពយន្តបរទេស រថយន្តផ្សាយចល័ត រួមនិងទីតាំងសំខាន់ៗជាច្រើនទៀត។ តាមរយៈដំណើរទស្សនៈកិច្ចនេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាននិងគណៈប្រតិភូបានបង្ហាញការចាប់យ៉ាងខ្លាំងចំពោះបច្ចេកវិជ្ជាទំនើបលំដាប់ស្តង់ដារអន្តរជាតិ និងទីតាំងដ៏ធំទូលាយរបស់ស្ថានីយ ក្រោមការវិនិយោគរបស់ក្រុមហ៊ុន LYP Group របស់អ្នកឧកញ៉ា លី យ៉ុងផាត់។
ស្ថានីយទូរទស្សន៍ភីអិនអិន គឺជាស្ថានីយលំដាប់អន្តរជាតិ និងធំជាងគេបង្អស់នៅកម្ពុជា ដែលប្រមូលផ្តុំដោយអ្នកដែលមានបទពិសោធន៍ច្រើនឆ្នាំក្នុងវិស័យសោតទស្សន៍និងវិស័យសារព័ត៌មាន។ ស្ថានីយទូរទស្សន៍មួយនេះទោះបីជាទើបតែបង្កើតថ្មី ប៉ុន្តែ បានក្លាយជាប្រព័ន្ធផ្សព្វផ្សាយឈានមុខគេមួយនៅកម្ពុជាដែលបានផ្តល់ជូនសាធារណៈជននូវព័ត៌មានប្រកបដោយវិជ្ជាជីវៈ និងការកម្សាន្តដ៏សម្បូរបែប។ ស្ថានីយទូរទស្សន៍ ភីអិនអិន បានក្លាយជាកន្លែងទទួលស្វាគមន៍ដំណើរទស្សនកិច្ចពីសំណាក់សិស្សនិស្សិត មន្ត្រីរាជការ ក្រុមហ៊ុនឯកជន រួមទាំងភ្ញៀវអន្តរជាតិ ជាបន្តបន្ទាប់។
គួរជម្រាបជូនថា ស្ថានីយទូរទស្សន៍ ភីអិនអិន បានចាប់ផ្តើមដំណើរការផ្សាយរយៈពេល ៥ឆ្នាំមកហើយ នឹងកំពុងទទួលបានប្រជាប្រិយភាពយ៉ាងខ្លាំងក្នុងចំណោមទូរទស្សនិកជន។ ជាមួយនឹងបណ្តាញគ្របដណ្តប់ការផ្សាយធំទូលាយរហូតដល់ ៩៥ភាគរយនៃផ្ទៃប្រទេសកម្ពុជា ដែលមានគុណភាពរូបភាពច្បាស់ល្អ និងធ្វើការផ្សព្វផ្សាយតាមបច្ចេកទេស ស្តង់ដារដែលមិនធ្លាប់មានពីមុនមក ភីអិនអិន បានក្លាយជាមោទនភាពមួយសម្រាប់កម្ពុជាក្នុងវិស័យសោតទស្សន៍៕
អត្ថបទ៖ អឿន ភារ៉ា រូបភាព៖ ក្រុមការងារ ភីអិនអិន