ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
ទើបតែបើកដំណើរការឡើងវិញកាលពីថ្ងៃចន្ទ សួនសត្វ Taronga Zoo ក្នុងទីក្រុងស៊ីដនីដែលមិនដែលបិទទ្វារមួយថ្ងៃណាឡើយរយៈពេលជាង ១០០ ឆ្នាំរហូតដល់ពេលមានជំងឺកូវីដ១៩ ត្រូវបានគេសង្កេតឃើញមានភ្ញៀវទេសចរជាច្រើនមកទស្សនាជាលក្ខណៈគ្រួសារ ជាពិសេសនៅកន្លែងសត្វកវែង តំបន់ស្វាឪ ឈីមផេនស៊ី (Chimpanzee) និងសត្វកូឡា (koala) ជាដើម។
សារមន្ទីរសិល្បៈញូវសៅវែល (New South Wales ) ក៏បានបើកទ្វារជាសាធារណៈជាលើកដំបូងដែរចាប់តាំងពីត្រូវបិទដោយសារជំងឺរាតត្បាត ដោយកំណត់ទទួលភ្ញៀវចូលត្រឹម ២០៩៦ នាក់។
ហាងកាហ្វេ ផាប់ និងភោជនីយដ្ឋាននានានៅរដ្ឋញូវសៅវែលដែលជារដ្ឋមានប្រជាជនច្រើនបំផុតរបស់ប្រទេសនេះត្រូវបានអនុញ្ញាតិឱ្យរៀបចំសម្រាប់ភ្ញៀវអង្គុយ ៥០ នាក់ ខណៈពិធីបុណ្យសពអាចប្រារព្ធបានដោយកំណត់ចំនួនភ្ញៀវត្រឹម ២០ នាក់។ សារមន្ទីរនិងបណ្ណាល័យដទៃទៀតក៏ត្រូវបានអនុញ្ញាតឱ្យបើកផងដែរ។
គិតត្រឹមថ្ងៃអង្គារ ប្រទេសអូស្រ្តាលីបានកត់ត្រាករណីឆ្លងវីរុសកូវីដ១៩សរុបចំនួន ៧២២១ ករណី និងមានអ្នកស្លាប់ចំនួន ១០៣ នាក់ ហើយខណៈដែលការឆ្លងថ្មីឥឡូវអាចគ្រប់គ្រងបានហើយ រដ្ឋាភិបាលក៏បានរៀបចំផែនការជំហានបន្ទាប់ដើម្បីលុបចោលការរឹតបន្តឹងទាំងអស់នៅត្រឹមខែកក្កដា ៕
ប្រែសម្រួល៖ វ៉ាន់ថន