ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
សារពត៌មាននៅប្រទេសចិន បានចុះផ្សាយច្រើនពីបាតុកម្មហិង្សាក្នុងទីក្រុងជាច្រើនទូទាំងសហរដ្ឋអាមេរិក ស្របគ្នាភាពចលាចលទាំងនោះ ត្រូវបានលើកឡើងច្រើនផងដែរនៅលើបណ្តាញទំនាក់ទំនងសង្គមអនឡាញ នៅប្រទេសចិន។ បាតុកម្មតាមទីក្រុងទូទាំងសហរដ្ឋអាមេរិកបានកើតឡើងក្រោយការស្លាប់បុរសស្បែកខ្មៅ George Floyd អាយុ៤៦ឆ្នាំកាលពីសប្តាហ៍មុន។
ស្របពេលដែល ចលាចលក្នុងទីក្រុងជាច្រើនរបស់សហរដ្ឋអាមេរិក ត្រូវបានសារព័ត៌មានអន្តរជាតិជាច្រើនចុះផ្សាយនោះ ចំណាប់អារម្មណ៍លើព័ត៌មានទាក់ទងនឹងបាតុកម្មក៏កើតមានផងដែរនៅប្រទេសចិននៅពេលទំនាក់ទំនងរវាង ប្រទេសទាំងពីរមិនសូវជាល្អនៅរយៈចុងក្រោយនេះ។
សារពត៌មានរដ្ឋចិន CCTV ផ្សាយពីបាតុកម្មនៅរដ្ឋមីនីសូតា និងរូបភាពវីដេអូ ប៉ះទង្គិចរវាងប៉ូលីស និងបាតុករ ដែលពលរដ្ឋអាមេរិកថតបាន។ សារព័ត៌មានរដ្ឋចិនមួយចំនួន បានធ្វើការប្រៀបធៀបរវាងបាតុកម្មនៅអាមេរិក និងបាតុកម្មនៅទីក្រុងហុងកុង។ ដែលនេះជាចំណុចចាប់អារម្មណ៍មួយថ្មីៗចុងក្រោយបំផុត នៅក្នុងទំនាក់ទំនងអាមេរិក និងប្រទេសចិន។
ងាកទៅមើលបណ្តាញទំនាក់ទំនងសង្គមនោះវិញ នៅលើបណ្តាញទំនាក់ទំនងសង្គមដ៏ធំរបស់ចិន Weibo យ៉ាងហោចណាស់ មានពត៌មានបាតុកម្ម៥ ស្ថិតនៅក្នុងចំណោមប្រធានបទពេញ និយមទាំង៥នៅត្រឹមថ្ងៃរសៀល។ ក្នុងចំណោមព័ត៌មានដែលពេញនិយមនោះ មានមួយជាព័ត៌មាននិយាយអំពីប្រធានាធិបតីអាមេរិក លោក Donald Trump ចូលទៅលាក់ខ្លួននៅលេនដ្ឋាន នៅពេលបាតុករហ៊ុំព័ទ្ធសេតវិមាន។
នៅលើបណ្តាញធ្វីតធ័រ បាតុកម្មក៏ជាប្រធានបទធំមួយក្នុងចំណោមប្រធានបទពេញនិយមទាំង២០ផងដែរ និងមានhashtag ថា #BunkerBoy ។
ប្រែសម្រួល៖ទួត ណាវ័ន្ត