នាយករដ្ឋមន្ត្រីប្រទេស នូវែលហ្សេឡង់ លោកស្រី ចាស៊ីនដា អាដឺន (Jacinda Ardern) ថ្លែងថាលោកស្រីពិត​ជាមានអារម្មណ៍ស្លុតរន្ធត់​ជាខ្លាំង បន្ទាប់ពីទទួល​ដំណឹងស្ដីពីមរណភាព​របស់ជនជាតិអាមេរិកាំង​ស្បែកខ្មៅ​ម្នាក់ឈ្មោះ ចចហ្វ្លយ (George Floyd)។ លោកស្រី​សូមគាំទ្រការហែបាតុកម្ម​ដោយសន្តិវិធីនៅក្នុង​ប្រទេសរបស់លោកស្រី​។ ប៉ុន្តែលោកស្រីយល់ថាការ​ហែបាតុកម្មនេះក៏ប៉ះពាល​ចំពោះវិធានការរក្សា​គំលាតសង្គម ដើម្បីការពារខ្លួន​ពីជំងឺ ខូវីដ១៩ ផងដែរ។

គេចាត់ទុក​លោកស្រី អាដឺន ជាអ្នកសេរីនិយមម្នាក់ ដែលលើក​កម្ពស់ការស្វែង​រកយុត្តិធម៌សង្គម គំនិតពហុនិយម និងសមភាពនិយម​។ សូមរំឭកថាកាលពីម្សិលមិញ គេឃើញ​ពលរដ្ឋ នូវែលហ្សេឡង់ រាប់ពាន់នាក់បានហែបាតុកម្មដោយសន្តិវិធី​ដើម្បីទាមទាររកយុត្តិធម៌​ជូនលោក ចចហ្វ្លយ​។

ចំណែកនៅសហរដ្ឋអាមេរិក​ឯណោះវិញ ក៏មានការហែបាតុកម្ម​ទូទាំងប្រទេសផងដែ​រនៅក្នុងបុព្វហេតុដូចគ្នា​។ ប៉ុន្តែនៅទីនោះ បាតុកម្មខ្លះកើត​មានអំពើហិង្សា និងការប៉ះទង្គិចគ្នា​រវាងពួកបាតុករ និងនគរបាលបង្ក្រាបបាតុកម្ម​៕

ប្រែ​សម្រួល​៖ អន សំអាង