ថ្ងៃសុក្រ ទី២៩ ខែមីនា ឆ្នាំ២០២៤
ថ្ងៃសុក្រ ទី២៩ ខែមីនា ឆ្នាំ២០២៤
លោកវេជ្ជបណ្ឌិត លាង រិទ្ធា ប្រធានកម្មវិធីជាតិប្រយុទ្ធប្រឆាំងជំងឺគ្រុនឈាម បានមានប្រសាសន៍ថា គិតត្រឹមសប្តាហ៍ទី២០ នៅកម្ពុជាមានជំងឺគ្រុនឈានចំនួន ជាង២៣០០ករណី ក៍ប៉ុន្តែមិនមានអ្នកស្លាប់នោះទេ។
ខេត្តក្រុងដែលមានគ្រុនឈាមច្រើនជាងគេរួមមាន ភ្នំពេញ កំពង់ធំ សៀមរាប កំពង់ស្ពឺ ត្បូងឃ្មុំ និងខេត្តតាកែវ ។ តាមការប៉ាន់ស្មានទុកជាមុន នៅឆ្នាំនេះនឹងមានគ្រុនឈាមកើតឡើងចំនួន ២ម៉ឺន៧ពាន់ករណី ។ ដោយឡែកកាលពីឆ្នាំមុន ជំងឺគ្រុនឈាមមានចំនួន ជិត៧ម៉ឺនករណី បណ្តាលអោយមនុស្សស្លាប់៤៧នាក់។
លោកវេជ្ជបណ្ឌិត លាង រិទ្ធាបានបន្ថែមថា ក្រសួងសុខាភិបាលបានត្រៀមថ្នាំអាបេតចំនួន ២៥០តោន ដើម្បីដាក់កុំអោយមានដង្កូវទឹក និងបានត្រៀមសេរ៉ូមសម្រាប់ព្យាបាលអ្នកជំងឺគ្រុនឈាមចំនួន ១០ម៉ឺនដប។
លោកវេជ្ជបណ្ឌិតបានណែនាំអោយពលរដ្ឋបង្កើនការសំអាតជុំវិញផ្ទះ កុំអោយដក់ទឹក និងត្រូវយកសំបកកំប៉ុងចាស់ៗ ជាពិសេសកង់ឡានចាស់មិនត្រូវអោយដក់ទឹកដែលអាចក្លាយជាជម្រករបស់សត្វមូស។
នៅលើទីផ្សារមិនមានថ្នាំអាបេតនោះទេ ដូច្នេះលោកវេជ្ជបណ្ឌិតបានណែនាំថា ពលរដ្ឋអាចទៅសុំនៅមណ្ឌលសុខភាពដើម្បីយកថ្នាំអាបេតទៅដាក់ក្នុងពាងទឹកការពារការកកើតសត្វមូស។
បន្ថែមពីនេះ លោកវេជ្ជបណ្ឌិតបានផ្តាំហើយម្តងហើយម្តងទៀតថា ប្រសិនបើមានកុមារឈឺដោយសង្ស័យពីជំងឺគ្រុនឈាមសូមប្រញ៉ាប់យកទៅមណ្ឌលសុខភាព ឫ មន្ទីរពេទ្យរដ្ឋជាបន្ទាន់ មិនត្រូវយកទៅមន្ទីរពេទ្យឯកជននោះទេ ។
លោកវេជ្ជបណ្ឌិតបានសង្កត់ធ្ងន់ថាកុមារភាគច្រើនបានស្លាប់ដោយសារតែអូសបន្លាយការព្យាបាលនៅតាមពេទ្យឯកជន ហើយយឺតពេលក្នុងការទៅមន្ទីរពេទ្យរដ្ឋ។
លោកវេជ្ជបណ្ឌិតបានក្រើនរម្លឹកអោយពលរដ្ឋងាកមកប្រុងប្រយ័ត្នលើជំងឺគ្រុនឈាម បន្ថែមពីលើជំងឺខូវិដ ១៩ ពីព្រោះថា រដូវវស្សាបានចូលមកដល់ ដែលជាការចាប់ផ្តើមនៃរដូវកាលជំងឺគ្រុនឈាម ដូច្នេះការលុបបំបាត់ជម្រកសត្វមូស ជាវិធីការពារបានមួយផ្នែកយ៉ាងល្អប្រសើរ៕