ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ការតវ៉ាប្រឆាំងនឹងការស្លាប់របស់បុរសឈ្មោះ George Floyd អាយុ ៤៦ ឆ្នាំនៅមន្ទីរឃុំខ្លួនរបស់ប៉ូលិសនៅទីក្រុង មីណេផូលីស កាលពីថ្ងៃចន្ទសប្ដាហ៍មុននេះ បានរាលដាល់ដល់ទីក្រុងមួយចំនួនរួមទាំងទីក្រុង ញូវយ៉ក ទីក្រុង ឡូសអេនជឺឡេស និងទីក្រុង បល់ទីម៉័រ (Baltimore) រដ្ឋ ម៉ារីឡេន ផងដែរ។ ក្រុមអ្នកតវ៉ាបានប្រមូលផ្ដុំគ្នារាប់រយនាក់និងជូនកាលរាប់ពាន់នាក់នៅតាមដងផ្លូវខណៈដែលសហរដ្ឋអាមេរិកទើបតែបើកទ្វារប្រទេសឡើងវិញក្រោយពីបានបិទទ្វាររយៈពេលយូរដើម្បីទប់ស្កាត់ការរាលដាលនៃជំងឺ ខូវីដ១៩។
អភិបាលក្រុង អេតឡេនតា (Atlanta) លោកស្រី ខេសា ឡេន បុតថិម (Keisha Lance Bottoms) បានណែនាំឲ្យប្រជាពលរដ្ឋនៅក្នុងទីក្រុងនេះថា ប្រសិនបើពួកគេបានចូលរួមការតវ៉ានេះ ពួកគេគួរតែពិចារណាទៅធ្វើតេសពិនិត្យមើលជំងឺ ខូវីដ១៩។
វេជ្ជបណ្ឌិតលោក វីល្លាម ស្កាហ្វនើ (William Schaffner) បាននិយាយថា រដែលក្រុមអ្នកតវ៉ាបានប្រមូលផ្ដុំស្ថិតនៅជិតគ្នារយៈពេលយូរនិងស្រែកតវ៉ាជិតៗគ្នានេះអាចបង្កើតការឆ្លងវីរុសនេះពីមនុស្សម្នាក់ទៅកាន់មនុស្សម្នាក់ទៀតកាន់តែខ្លាំងនិងកាន់តែលឿនផងដែរ។
ទន្ទឹមនេះដែរក្រុមគ្រូពេទ្យជំនាញបាននិយាយថា ទិន្នន័យថ្មីៗនេះរបស់សហរដ្ឋអាមេរិកបានបង្ហាញថា ពលរដ្ឋអាមេរិកស្បែកខ្មៅបានស្លាប់ដោយសារជំងឺ ខូវីដ១៩ ច្រើនជាងពលរដ្ឋអាមេរិកស្បែកសដែលនេះគឺជាការបង្ហាញឲ្យឃើញពីការទទួលបានសេវាសុខាភិបាលមិនស្មើគ្នារវាងពលរដ្ឋទាំង២នេះ៕
ប្រែសម្រួល៖ បុិច សុីនួន