ថ្ងៃសុក្រ ទី២៩ ខែមីនា ឆ្នាំ២០២៤
ថ្ងៃសុក្រ ទី២៩ ខែមីនា ឆ្នាំ២០២៤
ព្យុះត្រូពិចអាម៉ាន់ដា Amanda បានសម្លាប់មនុស្សយ៉ាងតិច៧នាក់ នៅប្រទេសអែលសាវ៉ាឌ័រ El Salvador បង្កអោយ មានភ្លៀងធ្លាក់ខ្លាំងធ្វើអោយទឹកទន្លេឡើងហៀរហួសច្រាំង ជន់លិចតាមដងផ្លូវជាច្រើន និងកើតមានបញ្ហាបាក់ដី។ នេះបើតាមការអោយដឹងពីអាជ្ញាធរប្រទេសអែលសាវ៉ាឌ័រកាលពីថ្ងៃអាទិត្យ។
ក្នុងចំណោមអ្នកស្លាប់មានក្មេងប្រុសម្នាក់អាយុ៨ឆ្នាំ ស្លាប់នៅពេលផ្ទះរបស់ក្មេងនេះរលំ។ ចំណែកជនរងគ្រោះផ្សេង ទៀតស្លាប់ ដោយសារបាក់រលំជញ្ជាំង និងខ្លះទៀតស្លាប់ដោយសារលង់ទឹកទន្លេដែលជន់ជោរឡើងខ្លាំង។
មជ្ឈមណ្ឌល National Hurricane Centre របស់អាមេរិកអោយដឹងថា ព្យុះអាម៉ាន់ដា ឬកន្ទុយព្យុះ នឹងបង្កអោយ មានភ្លៀងធ្លាក់ខ្លាំងនៅប្រទេសអែលសាវ៉ាឌ័រ, ភាគខាងត្បូងប្រទេសក្វាតេម៉ាឡា, ភាគខាងលិចប្រទេសហុងដូរ៉ាស, និងប្រទេសម៉ិកស៊ិក ដែលអាចបង្កអោយមានទឹកជំនន់ភ្លាមៗ និងគ្រោះបាក់ដី ធ្ងន់ធ្ងរគំរាមកំហែងដល់ជីវិតមនុស្ស ហើយការគំរាមកំហែងពីធម្មជាតិនេះ អាចបន្តនៅរយៈពេលជាច្រើនថ្ងៃជាបន្តទៀត។
ប្រែសម្រួល៖ ទួត ណាវ័ន្ត