ថ្ងៃសុក្រ ទី២៩ ខែមីនា ឆ្នាំ២០២៤
ថ្ងៃសុក្រ ទី២៩ ខែមីនា ឆ្នាំ២០២៤
រូបសំណាកព្រះមហាក្សត្រិយានីអេលីហ្សាបែតនៃចក្រភពអង់គ្លេស ដែលសូនពីក្រមួន ត្រូវគេបើកសម្ពោធជាសាធារណៈនៅឯសារមន្ទីរម៉ាដាមទូសសូត (Madame Tussauds) នៃទីក្រុងប្លេកភូល។ គេបានដង្ហែរូបសំណាកក្រមួននេះកាត់តាមដងវិថីនៃទីក្រុងប្លេកភូល ដោយដាក់នៅលើរទេះសេះ។ បន្ទាប់មក គេក៏ដឹករូបសំណាកទៅដាក់តាំងនៅខាងក្រៅសារមន្ទីរ។
រូបសំណាកធ្វើពីក្រមួននេះនឹងត្រូវគេដាក់តាំងនៅទីកន្លែងដែលមានភ្ញៀវទេសចរចេញចូលច្រើន ហើយដាក់ទន្ទឹមនឹងរូបសំណាករបស់ព្រះអង្គម្ចាស់វីលាម និងព្រះជាយារបស់ព្រះអង្គ។
រូបសំណាកថ្មីនេះនឹងជំនួសរូបចាស់ដែលដាក់តាំងកាលពីឆ្នាំ២០១២ និងដើម្បីរំឭកខួបទី៦០ឆ្នាំនៃការសោយរាជសម្បត្តិរបស់ព្រះមហាក្សត្រិយានី។ នៅក្នុងឆាកជីវិតដ៏វែងអន្លាយរបស់ព្រះនាង ដែលសព្វថ្ងៃមានព្រះជន្ម៩៥ព្រះវស្សា, គេបានធ្វើរូបសំណាករបស់ព្រះនាងពីក្រមួនចំនួន២៣ដង ដោយចាប់ផ្ដើមដំបូងពីឆ្នាំ១៩២៨ នៅពេលព្រះនាងមានព្រះជន្ម២ព្រះវស្សា។
អ្នករៀបចំការសូនរូបសំណាកនេះប្រាប់ថាកិច្ចការនេះមិនមែនធ្វើតែម្នាក់ឯងទេ គឺមានអ្នកជំនាញខាងវិស័យសូនរូប និងសិល្បៈមកពីគ្រប់ទិសទី សុទ្ធតែជាអ្នកជំនាញកម្រិតកំពូល និងធ្វើកិច្ចការដោយផ្ចិតផ្ចង់បំផុត ដើម្បីបង្កើតបានរូបសំណាកដែលល្អឥតខ្ចោះដូចព្រះមហាក្សត្រិយានីបេះបិត៕
ប្រែសម្រួល៖ អន សំអាង