មានមនុស្សយ៉ាងតិច២២នាក់បានស្លាប់បាត់បង់ជីវិត បន្ទាប់ពីមានភ្លៀងធ្លាក់ខ្លាំងបានកើតឡើងនៅរដ្ឋកេរ៉ាឡា(Kerala) ប្រទេសឥណ្ឌា កាលពីអំឡុងចុងសប្តាហ៍។ យោងអាជ្ញាធរឥណ្ឌាអោយដឹងនៅថ្ងៃអង្គារ។

ភ្លៀងធ្លាក់ខ្លាំង នៅទូទាំងរដ្ឋកេរ៉ាឡា(Kerala) បានបណ្តាលអោយកើតមានទឹកជំនន់ និងគ្រោះមហន្តរាយបាក់ដី នៅតាមតំបន់ជាច្រើន។ ទាំងយោធាជើងគោក និងយោធាជើងទឹកត្រូវបញ្ជូនទៅជួយពលរដ្ឋនៅតំបន់រងគ្រោះ។

យ៉ាងណាក៏ដោយ មានការព្យាករណ៍ពីទីភ្នាក់ងារគ្រប់គ្រងគ្រោះមហន្តរាយធម្មជាតិអោយបានដឹងថា ភ្លៀងនៅតែបន្តធ្លាក់នៅក្នុងរដ្ឋនេះ ជាបន្តទៀតក្នុងកម្រិតតិចតួច ។

កាលពីឆ្នាំ២០១៨ រដ្ឋកេរ៉ាឡា (Kerala) ក៏ជារដ្ឋមួយរងគ្រោះទឹកជំនន់ធ្ងន់ធ្ងរ ដែលមានមនុស្សយ៉ាងតិច៤០០នាក់ស្លាប់ និង២០០,០០០នាក់ បាត់បង់ទីជម្រក។

 ភ្លៀងធ្លាក់ជាប្រចាំឆ្នាំ នៅប្រទេសឥណ្ឌា ជាប្រយោជន៍សំខាន់ណាស់សម្រាប់ពលរដ្ឋឥណ្ឌា ដោយសារទឹកភ្លៀងជាតម្រូវការចាំបាច់ សម្រាប់ពលរដ្ឋ២ភាគ៣ នៃពលរដ្ឋឥណ្ឌាសរុបចំនួន១,៣ពាន់លាននាក់ដែលរស់នៅក្នុងតំបន់ជនបទពឹងផ្អែកទៅលើការធ្វើកសិកម្ម។ យ៉ាងណាក៏ដោយ ភ្លៀងធ្លាក់ខ្លាំង បានបង្កអោយកើតមានទឹកជំនន់ គ្រោះមហន្តរាយបាក់ដី និងជំងឺឆ្លងតាមទឹកមិនស្អាត។  

ប្រែសម្រួល៖ណាវ័ន្ត