ប្រទេសរុស្ស៊ី នៅថ្ងៃព្រហស្បតិ៍បានអោយដឹងថា មនុស្សស្លាប់ដោយសារជំងឺកូវីដ១៩មាន៨២០នាក់ ក្នុងរយៈពេល២៤ម៉ោងកន្លងទៅ ដែលជាតួលេខមនុស្សស្លាប់ដោយសារជំងឺកូវីដ១៩ជាថ្មីមានចំនួនច្រើននៅរយៈចុងក្រោយនេះនៅថ្ងៃ២៦សីហា។ ស្របគ្នាអាជ្ញាធរបានព្រមានថា ករណីអ្នកកើតជំងឺកូវីដ១៩អាចកើនឡើងឆាប់រហ័សជាថ្មីម្តងទៀត។

ទីក្រុងម៉ូស្គូ មានអ្នកឆ្លងជំងឺកូវីដ១៩ចំនូន៣៤៤៥នាក់ក្នុងពេល២៤កន្លងទៅ ក្នុងពេលតែមួយថ្ងៃ ជាតួលេខខ្ពស់មិនធ្លាប់មានចាប់តាំងពីថ្ងៃទី៣១ខែកក្កដា ក្រោយករណីឆ្លងច្រើននៅអំឡុងពេលរដូវក្តៅ។ ចំណែកនៅទូទាំងប្រទេសមានអ្នកឆ្លងជំងឺកូវីដ១៩ចំនួន២១,៤៣៨នាក់។

មន្ត្រីនៃវិមានគ្រីមឡាំងបានថ្លែងប្រាប់ក្រុមអ្នកសារព័ត៌មានថា នៅមិនទាន់មានការពិភាក្សាគ្នានៅឡើយទេពីការអនុវត្តន៍វិធានការបិទខ្ទប់សារជាថ្មី ឬក៏វិធានការរឹតត្បិតណាមួយនោះ ប៉ុន្តែមន្ត្រីរដ្ឋាភិបាល និងមន្ត្រីតាមតំបន់នីមួយៗ កំពុងឃ្លាំមើលស្ថានភាពយ៉ាងដិតដល់។

ប្រទេសរុស្ស៊ី ចាប់តាំងពីផ្ទុះការឆ្លងរាលដាលជំងឺកូវីដ១៩រហូតមកដល់ពេលនេះ មានករណីអ្នកកើតជំងឺកូវីដ១៩នៅទូទាំងប្រទេសចំនួន៧,៣៥៤,៩៩៥នាក់ ហើយអ្នកស្លាប់ដោយសារជំងឺកូវីដ១៩មានចំនួន២០១,៤៤៥នាក់។

ប្រែសម្រួល៖ណាវ័ន្ត