ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
សិល្បករជនជាតិថៃមួយរូប អាយុ៣៧ឆ្នាំ បាននិងកំពុងតែដើរគូសវាសនៅតាមរបងថ្មនៃទីក្រុង បាងកក ដោយបង្កប់រូបភាពមានន័យគ្រប់គ្រាន់ សម្រាប់ពិពណ៌នាអំពីគ្រោះថ្នាក់នៃជំងឺ ខូវីដ១៩ និងវិធីបង្ការខ្លួនពីជំងឺនេះ។ ជនជាតិថៃរូបនេះ មិនបានប្រើប្រាស់ឈ្មោះពិតរបស់គាត់ទេ។ ប៉ុន្តែគាត់ប្រើរហស្សនាមថា មូប៊ុន (Mue Bon)។
គាត់ចង់ក្រើនរំឭកមនុស្សទូទៅអំពីសភាពការណ៍ចុងក្រោយនៃជំងឺ ខូវីដ១៩ និងកត់ត្រាទុកនៅក្នុងក្រាំងប្រវត្តិសាស្ត្រថាពួកយើងនាំគ្នាស្នាក់នៅតែក្នុងផ្ទះ ក៏ចាត់ទុកថាជាការជួយគ្នាទៅវិញទៅមកនៅក្នុងការកាត់បន្ថយជំងឺ ខូវីដ១៩។ ហើយគាត់ច្រើនគូរជារូបរាងសត្វស្លាបប្លែកៗ ដែលគាត់ប្រៀបប្រដូចទៅនឹងអ្នកការពារមនុស្សពីការយាយីរបស់ជំងឺ ខូវីដ១៩។ គាត់ចូលចិត្តបង្ហាញរូបគំនូរតាមចិញ្ចើមផ្លូវ ជាជាងយកទៅតាំងពិព័រណ៍នៅវិចិត្រសាល។ គាត់យល់ថាធ្វើបែបនេះនឹងជួយឲ្យសាធារណជនបានស្គាល់ និងទស្សនាស្នាដៃសិល្បៈរបស់គាត់កាន់តែច្រើន។
ជានិច្ចកាល បុរសរូបនេះចូលចិត្តគូរគំនូរនៅពេលយប់ស្ងាត់។ ភាគច្រើនគាត់ប្រើប្រាស់បំពង់ស្ប្រ៉ាយបាញ់ជារូបភាពផ្សេងៗ និងត្រូវការពេល២ម៉ោង អាចគូរបានរូបគំនូរមួយផ្ទាំង។ ទោះបីជាសិល្បកររូបនេះនិយាយរបៀបដាក់ខ្លួនថាគាត់មិនសូវល្បីប៉ុន្មានក៏ដោយ ប៉ុន្តែតាមការពិតស្នាដៃគំនូររបស់គាត់ត្រូវគេយកទៅបង្ហាញនៅប្រទេសជាច្រើនដូចជា ជប៉ុន សហរដ្ឋអាមេរិក អាល្លឺម៉ង់ និងដែនដីប៉ាឡេស្ទីនជាដើម៕
ប្រែសម្រួល៖ អន សំអាង