ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
តម្លៃភាគហ៊ុនផលិតកម្មចម្រៀងលំដាប់ពិភពលោក Universal Music Group បានហក់ឡើងខ្ពស់ ខណៈវិនិយោគិនជាច្រើនជឿជាក់ថាសេវាកម្មស្ដាប់ចម្រៀងពីផលិតកម្មនេះតាមអនឡាញមានអនាគតយូរអង្វែង។
តម្លៃលើទីផ្សាររបស់ផលិតកម្មចម្រៀង Universal Music Group បានហក់ឡើងដល់ប្រមាណ ៥៥ពាន់លានដុល្លារ កាលពីថ្ងៃទី២១ ខែកញ្ញា ជាថ្ងៃដែលផលិតកម្មយក្សនេះចុះឈ្មោះក្នុងទីផ្សារភាគហ៊ុនជាផ្លូវការ។
នៅថ្ងៃនោះ គេឃើញតម្លៃហ៊ុនរបស់ផលិតកម្ម Universal មានតម្លៃប្រមាណ ៣០ដុល្លារក្នុងមួយចំណែកហ៊ុន ដែលតម្លៃនេះគឺខ្ពស់ជាងតម្លៃព្យាករប្រមាណ ៣៩% ឯណោះ។
ប្រភពនៃប្រាក់ចំណូលរបស់ផលិតកម្ម Universal Music Group គឺទទួលបានមកពីកម្មសិទ្ធិបញ្ញាលើបទចម្រៀងយ៉ាងច្រើនមហាសាលរបស់តារាល្បីៗជាច្រើន មានដូចជា Billie Eilish (ប៊ីលី អាយលីស្ស), Adele (អាឌេល), Taylor Swift (ថេឡឺ ស្វីស) និង Ariana Grande (អារីអាណា ហ្គ្រន់ដេ) ជាដើម។
គួរបញ្ជាក់ដែរថា ប្រាក់ចំណូលរបស់ផលិតកម្ម Universal Music Group បានកើនឡើងរយៈពេល៦ឆ្នាំជាប់គ្នាមកហើយ ទោះបីជាមានការផ្ទុះឡើងនូវវិបត្តិកូវីដ១៩ក្ដី។ ផលិតកម្មបានព្យាករថានៅឆ្នាំ២០២១នេះប្រាក់ចំណូលរបស់ខ្លួននឹងមានកំណើនយ៉ាងតិច១០%៕
ប្រែសម្រួល៖ វ៉ាន់ថន