ថ្ងៃអង្គារ៍ ទី២៣ ខែមេសា ឆ្នាំ២០២៤
ថ្ងៃអង្គារ៍ ទី២៣ ខែមេសា ឆ្នាំ២០២៤
ម្ចាស់ជយលាភីពីកម្មវិធី Face of Cambodia ចំនួន២ រូប បង្ហាញឆន្ទៈ និងរំពឹងយកឈ្នះការប្រកួតលើឆាកអន្តរជាតិ នៅប្រទេសកូរ៉េខាងត្បូង ក្រោយរៀនសូត្រពីបទពិសោធន៍បរាជ័យច្រើនដង។
ក្រោយទទួលបានតំណែងជយលាភីលេខ១ពីកម្មវិធី Face of Cambodia 2021 កញ្ញា លុន គីមហេង និងលោក សុខ ហ៊ុយ ថ្មីៗនេះ បានជម្រាបប្រាប់ពីការតាំងចិត្ត និងការត្រៀមខ្លួនពង្រឹងសមត្ថភាពលើចំណុចខ្សោយរបស់ខ្លួន ដើម្បីត្រៀមទៅប្រកួតប្រជែងជាមួយបណ្តាប្រទេសផ្សេងទៀតក្នុងកម្មវិធី Face of Asia នៅកូរ៉េខាងត្បូង។
ដោយសារតែធ្លាប់ឆ្លងកាត់ការបរាជ័យច្រើនដងលើវេទិកាប្រកួតប្រជែងសម្រស់និងសមត្ថភាពក្នុងស្រុក ម្ចាស់ជយលាភីទាំងពីររូប បានយកបទពិសោធន៍ទាំងនេះមករៀនសូត្រ និងពង្រឹងបន្ថែម ដោយរំពឹងអាចយកឈ្នះ និងធ្វើឱ្យបានល្អបំផុតលើឆាកអន្តរជាតិនាពេលខាងមុខនេះ។
គួររំលឹកថា កម្មវិធី Face of Asia ជាកម្មវិធីប្រកួតប្រជែងលំដាប់ជួរមុខមួយនៅអាស៊ីដែលកំពុងរីកដុះដាលជារូបតំណាងដ៏សំខាន់សម្រាប់វិស័យវប្បធម៌ និងសិល្បៈ ល្បីល្បាញនៅអាស៊ី និងវេទិកាមាតិកាវប្បធម៌សកល។
ជាពិសេសគឺការបង្ហាញពីឧស្សាហកម្មម៉ូដ ម៉ូដែល និងសម្រស់នៃអាស៊ីដល់ពិភពលោក និងណែនាំពីសិល្បករអន្តរជាតិទៅកាន់អាស៊ីទៀតផង។Face of Asia ឆ្នាំ២០២១ នឹងប្រព្រឹត្តទៅនៅចុងខែធ្នូ ដោយមានការចូលរួមពីបណ្តាប្រទេសសរុបចំនួនជាង ២៤ ប្រទេស។
ខណៈដែលបេក្ខភាពតំណាងកម្ពុជា កញ្ញាលុន គីមហេង និងលោក សុខ ហ៊ុយ ក៏នឹងត្រៀមពាំនាំនូវឈុតតំណាងជាតិយ៉ាងស្រស់ស្អាត និងទេសកោសល្យពិសេសៗមួយចំនួន ដើម្បីបង្ហាញពីភាពលេចធ្លោនៃវប្បធម៌អច្ឆរិយៈរបស់ព្រះរាជាណាចក្រកម្ពុជាជាដើម។
អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងផ្តល់ឲ្យ