ថ្ងៃសុក្រ ទី២២ ខែតុលា ឆ្នាំ២០២១

មហាអំណាចសេដ្ឋកិច្ចចិន សម្រេចកាត់បន្ថយការនាំចូលគ្រឿងសមុទ្រពី វៀតណាម ដោយសារកូវីដ១៩

៣០ សីហា ២០២១ | សេដ្ឋកិច្ច

 

មហាអំណាចសេដ្ឋកិច្ចចិន បានសម្រេចកាត់បន្ថយការនាំចូលគ្រឿងសមុទ្រពី វៀតណាម ដោយសារបញ្ហាកូវីដ១៩ ដោយភាគីចិន បានរឹតបន្តឹងលក្ខខណ្ឌនាំចូលជាច្រើន បន្តជាការលំបាកដល់ វិស័យជលផលរបស់វៀតណាម។ នេះបើយោងតាមការចេញផ្សាយដោយ សារព័ត៌មានក្នុងស្រុកវៀតណាម នៅថ្ងៃនេះ។


សមាគមអ្នកផលិត និងនាំចេញគ្រឿងសមុទ្រវៀតណាម បានបង្ហាញថា នៅក្នុងរយៈពេល ៧ខែ ដើមឆ្នាំ ២០២១នេះ ការនាំចេញគ្រឿងសមុទ្រពី វៀតណាម ទៅកាន់ប្រទេសចិន សម្រេចបានជាទឹកប្រាក់ប្រមាណ ២៣៨លានដុល្លារអាមេរិក មានការធ្លាក់ចុះជាង ៥% ធៀបនឹងពេលដូចគ្នាកាលពីឆ្នាំមុន។


បញ្ហាចំបង កើតមានឡើងនៅចន្លោះថ្ងៃទី ២០ ខែមិថុនា ដល់ថ្ងៃទី ១៥ ខែកក្កដា ដែលតំបន់ពាណិជ្ជកម្មដ៏ធំបំផុតមួយរបស់ចិន គឺតំបន់ហ្សង់ជាំង បានសម្រេចហាមឃាត់ការនាំចូលគ្រឿងសមុទ្រកក ពីបណ្តាប្រទេសចំនួន ១១ ដែលរួមមានទាំង ឥណ្ឌា វៀតណាម និងថៃ ដោយសារតែបញ្ហាមេរោគកូវីដ១៩។


លើសពីនេះ ការនាំចេញត្រីប្រាពីវៀតណាម ទៅកាន់ប្រទេសចិន ក៏មានការធ្លាក់ចុះ ដោយក្នុងត្រីមាសទី ២ បានធ្លាក់ចុះ ១១% ហើយនៅក្នុងត្រីមាសទី ៣ នេះ អាចនឹងបន្តការធ្លាក់ចុះទៀត ដែលប៉ះពាល់ក្រុមហ៊ុនវៀតណាមជាង ១០០ក្រុមហ៊ុន។


សមាគមអ្នកផលិត និងនាំចេញគ្រឿងសមុទ្រវៀតណាម អះអាងថា ទោះបីជា ចិន មានតម្រូវការផលិតផលគ្រឿងសមុទ្រវៀតណាមច្រើនក៏ដោយ រដ្ឋាភិបាលចិន នៅតែចាត់វិធានការក្តៅ រឹតបន្តឹងគ្រប់លក្ខខណ្ឌនៃការនាំចូល ហើយជាពិសេស ប្រជាជនចិន ចាប់ផ្តើមងាកទៅប្រើប្រាស់ផលិតផលក្នុងស្រុកវិញ ដែលធ្វើឲ្យ រដ្ឋាភិបាលចិន កាន់តែរឹតបន្តឹងលើការនាំចូល។


បន្ថែមលើនេះ ចិន ក៏បានរឹតបន្តឹងលើការនាំចូលផលិតផលកសិកម្មពីប្រទេសវៀតណាម នៅតាមតំបន់ពាណិជ្ជកម្មតាមព្រំដែន ដូចជា ខេត្តយូណាន ប្រទេសចិន ដែលផ្អាកនាំចូលផលិតផលកសិកម្មវៀតណាមជាង ១ខែទៅហើយ។

 


គួរជម្រាបផងដែរថា នៅក្នុងរយៈពេល ៧ខែ ដើមឆ្នាំ ២០២១នេះ វៀតណាម សម្រេចការនាំចេញទំនិញប្រមាណ ២៨ពាន់លានដុល្លារអាមេរិក ទៅកាន់ប្រទេសចិន ដែលមានកំណើនដល់ទៅ ២៤% ធៀបនឹងពេលដូចគ្នាកាលពីឆ្នាំមុន៕

 

 

អត្ថបទ៖ ងួន សុភ័ត្រ្តា និងរូបភាពឯកសារ

 

ព័ត៌មានដែលទាក់ទង

Copyright © 2016 PNN NEWS. All Rights Reserved.