ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
មនុស្សម្នារាប់រយនាក់លែងខ្វល់ពីវិធានការរឹតបន្តឹងទប់ស្កាត់ការរាលដាលនៃជំងឺឆ្លងខូវីដ១៩ដោយនាំគ្នាសម្រុកទៅរកកសិដ្ឋានមួយនៅប្រទេសបង់ក្លាដែសដើម្បីមើលសត្វគោកម្ពស់២០អ៊ីញប្រហែល៥១សង់ទីម៉ែត្រ ហើយអ្នករក្សាសត្វគោនេះសង្ឃឹមថា វានឹងក្លាយជាសត្វគោទាបជាងគេបំផុតនៅលើពិភពលោក។
សត្វគោតឿដែលមានឈ្មោះថា រ៉ានី នេះមានកម្ពស់ ៥១ សង់ទីម៉ែត្រ បណ្តោយប្រវែង ២៦ អ៊ីញប្រហែល ៦៦សង់ទីម៉ែត្រ ហើយមានទំងន់ ២៦ គីឡូក្រាមដែលស្រាលល្មមនឹងអាចចាប់លើកបីបាន។
អ្នកថែសត្វគោតឿនេះស្រឡាញ់សត្វគោនេះព្រោះវាស៊ីចំណីអាហារក្នុង១ថ្ងៃតែ ២០០ ក្រាមតែប៉ុណ្ណោះ ហើយអ្នកគ្រប់គ្រងកសិដ្ឋានសត្វគោនេះបាននិយាយថា ពួកគេបានដាក់ពាក្យសុំចុះបញ្ជីក្នុងសៀវភៅកំណត់ត្រាពិភពលោក Guinness ដើម្បីវាយតម្លៃថា តើរ៉ានីនេះអាចក្លាយជាសត្វគោទាបបំផុតក្នុងពិភពលោកដែរឬទេ។
លោក ម៉ូហាម៉ាត់ សាលីម មន្ត្រីនៅកសិដ្ឋានចិញ្ចឹមសត្វគោ ស៊ីកូអាក្រូ (Shikor Agro) បាននិយាយថា ពួកគេពិតជាជឿជាក់ក្នុងចិត្តថា សត្វគោនេះនឹងជាប់ចំណាត់ថ្នាក់ជាសត្វគោទាបជាងគេបំផុត។
គេហទំព័ររបស់សៀវភៅកំណត់ត្រាពិភពលោកហ្គីនណេសបានបង្ហាញថា បច្ចុប្បន្នចំណាត់ថ្នាក់នេះត្រូវបានប្រគល់ឱ្យសត្វគោឈ្មោះ ម៉ានីកយ៉ាម (Manikyam) មកពីរដ្ឋ Kerala នៅប្រទេសឥណ្ឌាដែលមានកម្ពស់ ២៤,០៧ អ៊ីញប្រហែល ៦១ សង់ទីម៉ែត្រ និងបានចុះបញ្ជីក្នុងសៀវនេះនៅក្នុងឆ្នាំ២០១៤៕
ប្រែសម្រួល៖ ប៉ិច ស៊ីនួន