សិល្បករជនជាតិចិនឈ្មោះអៃវៃវៃ(Ai Weiwei) បាននាំយកឈើព្រៃ១ដើម (ដែលដុះនៅតំបន់ត្រូពិក កម្ពស់៣២ម៉ែត្រ ធ្វើពីដែកសុទ្ធ) ទៅដាក់តាំងនៅប្រទេសព័រទុយហ្កាល់។

លោកឲ្យឈ្មោះស្នាដៃសិល្បៈនេះថា «ដើមប៉េគី» ដែលលោកសង្ឃឹមថាវាអាចនឹងជួយបញ្ជ្រាបការយល់ដឹងពីហានិភ័យចំពោះបរិស្ថាន ដែលកើតឡើងដោយសារការកាប់បំផ្លាញព្រៃឈើ។

កាលពីបួនឆ្នាំមុន, លោកអៃវៃវៃបានធ្វើដំណើរទៅប្រទេសប្រេស៊ីល បំណងថាចង់ស្រាវជ្រាវពីបញ្ហាប្រឈមដែលអាចនឹងកើតមានចំពោះព្រៃឈើ។ ប៉ុន្តែអ្វីដែលគាត់មិននឹកស្មាន និងជួបដោយចៃដន្យនោះ គឺការប្រទះឃើញឈើកម្រ១ដើម ដែលមានវ័យចំណាស់ បន្សល់ទុកតាំងពីសម័យបុរាណ ជាប្រភេទដើមឈើដែលសឹងតែផុតពូជពីលើភពផែនដីដោយសារស្នាដៃកាប់បំផ្លាញរបស់មនុស្ស។

វាគឺជាឈើព្រៃមួយប្រភេទដែលដុះនៅក្នុងព្រៃនៃតំបន់អាត្លង់ទិកភាគឦសាន។ ក្រោយមក គេបានប្រើប្រាស់បង្គង និងរន្ទា ដើម្បីចាក់ពុម្ពស្រោបពីខាងក្រៅដើមឈើ ធ្វើជាប៉ាន់គំរូ។ គេដឹកពុម្ពដើមឈើនេះទៅប្រទេសចិន ដើម្បីចាក់ពុម្ពពីដែកឲ្យចេញជារូបរាងដូចដើមឈើ។

គេក៏ដឹកដើមឈើធ្វើពីដែកនោះទៅដាក់តាំងនៅសារមន្ទីរនៃប្រទេសព័រទុយហ្កាល់។ ដើមឈើដែករបស់លោកអៃវៃវៃមិនមានស្លឹក ឬបែកមែកសាខាទេ។ ប៉ុន្តែវាមានលក្ខណៈប្រហោងក្នុង និងមានច្រេះចាប់។ ទាំងនេះជាការក្រើនរំឭកឲ្យយើងចាប់អារម្មណ៍ពីបញ្ហាប្រឈមរបស់ប្រព័ន្ធបរិស្ថានជាសាកល៕

ប្រែសម្រួល៖ អន សំអាង