ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
បាត់មុខពីសិល្បៈមួយរយៈ ស្រាប់តែតារាបង្ហាញម៉ូដ និងជាអ្នកចូលចិត្តរចនាម៉ូដសម្លៀកបំពាក់ប្លែកៗ រំដួលលិចទឹក ធ្លាក់ខ្លួនឈឺគួរឱ្យព្រួយបារម្ភជាង ៣ខែមកនេះ ។
តាមរយៈរូបភាពប៉ុន្មានសន្លឹកនេះធ្វើឱ្យទស្សនិកជនមានការភ្ញាក់ផ្អើលយ៉ាងខ្លាំងក្រោយពីឃើញ ស្ថានភាពតារាបង្ហាញម៉ូដ និងជាអ្នកចូលចិត្តច្នៃម៉ូដសំលៀកបំពាក់ប្លែក រំដួលលិចទឹក ធ្លាក់ខ្លួនស្គមប្រាណសល់តែស្បែកដណ្តប់ឆ្អឹង ដោយសារមានជំងឺជាប់ប្រាណរយៈពេលជិត ៣ ខែមកហើយ ។
ទោះបីជាខ្លួនកំពុងដេកឈឺនៅនិងកន្ទេល ប៉ុន្តែតារាបង្ហាញម៉ូដ រូបនេះមិនចង់បង្ហាញឱ្យទស្សនិកជនឃើញពីស្ថានភាពខ្លួនឡើយ។ ទើបតែថ្មីៗនេះរូបភាពដែលនាងកំពុងសម្រាកព្យាបាលជំងឺ ស្រាប់តែបង្ហាញនៅ លើបណ្តាញសង្គម រហូតបង្កឱ្យមានការព្រួយបារម្ភយ៉ាងខ្លាំពីមហាជន មិត្តភក្តិ និងក្រុមគ្រួសារ ។ ក្រោយពីឃើញស្ថានភាពបែបនេះ មានទស្សនិកជន និង សប្បុរសជនជាច្រើនចង់ជួយនាង ប៉ុន្តែមើលទៅនាងហាក់ដូចជាមិនចង់ទទួលនោះទេ ទើបព្យាយាមមិនចង់បង្ហាញបែបនេះ ។
រំដួលទឹកចិត្ត មិនបានប្រាប់ពីស្ថានភាពជំងឺរបស់លោកពិតប្រាកដនោះទេ ពីព្រោះនាងមិនចង់ឱ្យនរណាដឹងអំពីរឿងនេះ តែតាមប្រភពព័ត៌មានពីអ្នកសិទ្ធជាមួយបានបង្ហើបប្រាប់ថា រំដួលលិចទឹក មានជំងឺជាតិពុលនៅក្នុងឈាម ក្រពះធ្វើទុក្ខខ្លាំង ពិបាកដង្ហើម ញុំាអ្វីក៏មិនបានរហូតធ្វើឱ្យស្រគីឡូ សល់តែស្បែកដណ្តប់ឆ្អឹង ។
ក្រោយមកទើប រំដួលលិចទឹក បានបង្ហោះសារនៅលើ ហ្វេសប៊ុក របស់ខ្លួនថា « នាងខ្ញុំ រំដួលលិចទឹក សូមធ្វើការសូមទោសចំពោះបណ្តាក្រុមហ៊ុនក៏ដូចជាក្រុមការងារសង្គមទាំងអស់ ដែលបានទំនាក់ទំនងការងារមកកាន់រូបខ្ញុំ ហើយរូបខ្ញុំរៀបចំមិនទាន់ពេលវេលា ដោយសារខ្ញុំមានជំងឺ សុខភាពទ្រុឌទ្រោមខ្លាំងរយៈពេលជិត ៣ ខែមកហើយ ខ្ញុំមិនអាចចូលរួម ឬបំពេញការងារទាន់ពេលវេលា ដូច្នេះរូបខ្ញុំសុំការយោគយល់ និង អធ្យាស្រ័យ » ។
បន្ទាប់ពីទទួលបានការលើកទឹកចិត្ត និង ការផ្តល់កម្លាំងចិត្តពីអ្នកជំវិញខ្លួន តារាបង្ហាញម៉ូដ រំដួលលិច ទឹក មានអារម្មណ៍រំភើបថែមទាំងបានពោលពាក្យថា នាងពិតជារំភើបចិត្ត និងអរគុណនូវទឹកចិត្តអ្នកទាំងអស់គ្នា ។
រំដួលលិចទឹក គឺជាតារាបង្ហាញម៉ូដមួយរូបដែលចូលចិត្តច្នៃម៉ូដសម្លៀកបំពាក់ប្លែក ពីរុក្ខជាតិ និង សំភារៈនានា ទាក់ទងនិងសិល្បៈវប្បធម៌ ទស្សនិកជនទាំងក្នុងនិងក្រៅប្រទេស សុទ្ធតែស្រឡាញ់គាំទ្រស្នាដៃដ៏ប៉ិនប្រសព្វរបស់នាង ៕
អត្ថបទ ៖ ម៉ា រីសា រូបភាព ៖ PNN និង ហ្វេសប៊ុក