ថ្ងៃសុក្រ ទី២៩ ខែមីនា ឆ្នាំ២០២៤
ថ្ងៃសុក្រ ទី២៩ ខែមីនា ឆ្នាំ២០២៤
កម្ពុជារំពឹងទាក់ទាញភ្ញៀវទេសចរបរទេសបានកាន់តែច្រើននៅខេត្តព្រះសីហនុតាមរយៈកម្ពុជាធ្វើជាម្ចាស់ផ្ទះនៃវេទិកាទេសចរណ៍អាស៊ាននៅខែមករា ឆ្នាំ២០២២ខាងមុខនេះ ខណៈពេលសភាពការណ៍កូវីដ ១៩ បានធូរស្រាល។
រដ្ឋមន្រ្តីក្រសួង ទេសចរណ៍ ឯកឧត្តម ថោង ខុន បានគូបញ្ជាក់ថា វេទិកាទេសចរណ៍អាស៊ាន ឆ្នាំ២០២២ ខាងមុខនេះ នឹងទាក់ទាញទេសចរបរទេសមកខេត្តព្រះសីហនុបានច្រើន ខណៈពេលសភាពការណ៍កូវីដ-១៩ធូរស្រាល ហើយក្រុមហ៊ុនទេសចរណ៍កម្ពុជានឹងអាចពង្រីកដៃគូធុរកិច្ចរបស់ខ្លួនបានកាន់តែច្រើនជាងមុន។
ជុំវិញនឹងការលើកឡើងនេះដែរ លោកស្រី ឆាយ ស៊ីវលីន ប្រធានសមាគមទីភ្នាក់ទេសចរណ៍កម្ពុជាបានគូសបញ្ជាក់ប្រាប់ភីអិនអិន នៅថ្ងៃនេះដែរថា កម្ពុជានឹងយកវេទិកាទេសចរណ៍អាស៊ាន ឆ្នាំ២០២២ ប្រកាសទូងស្គរប្រាប់ទៅដល់ពិភពលោកឲ្យបានដឹងកាន់ច្រើនអំពីសក្តានុពលវិស័យទេសចរណ៍ និងបង្ហាញប្រាប់ថា កម្ពុជាកំពុងត្រៀមខ្លួននៅក្នុងការស្តារឡើងវិញនៃវិស័យទេសចរណ៍។
លោកស្រីបន្ថែមឲ្យដឹងទៀតថា ក្នុងនាមវិស័យឯកជនគឺមានការគាំទ្រទាំងស្រុង និងក្នុងនោះផងដែរយើងក៏ចង់ឲ្យមានការចូលរួមអំពីគ្រប់ស្ថាបនពាក់ព័ន្ធដោយត្រូវគិតអំពីការសម្រួលដល់ភ្ញៀវដែលបានចូលលរួមក្នុងវេទិកានេះដែរ។
យោងតាមរដ្ឋមន្រី្តក្រសួងទេសចរណ៍ ឯកឧត្តម ថោង ខុន នៅចុងសប្ដាហ៍ទីបីនៃខែកក្កដា កម្ពុជាទទួលភ្ញៀវទេសចរជាង ៦ម៉ឺននាក់ក្នុងនោះ ខេត្តព្រះសីហនុមានចំនួនរហូតជាង ៧ពាន់៦០០នាក់ ពោលគឺចំនួនភ្ញៀវនាសប្តាហ៍ទី៣ នេះមានការធ្លាក់ចុះជាង ៩ភាគរយ ធៀបនឹងសប្តាហ៍កន្លងទៅ៕
អត្ថបទ: ស៊ឺន សុន និងរូបភាពឯកសារ