ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
អាជ្ញាធរប៉ាគីស្ថាន នៅរសៀលនេះបានបញ្ជាក់អោយដឹងថា មនុស្ស៩៧នាក់ស្លាប់ និង២នាក់នៅរស់រានមានជីវិត ក្រោយយន្តហោះក្រុមហ៊ុនអាកាសចរណ៍Pakistan International Airlines ធ្លាក់ក្នុងសង្កាត់ដែលមានពលរដ្ឋរស់នៅកកកុញនៅក្នុងទីក្រុងការ៉ាឈិ នៃប្រទេសប៉ាគីស្ថាន។
នាយកប្រតិបត្តិក្រុមហ៊ុនអាកាសចរណ៍ខាងលើ លោក Arshad Malik បានលើកឡើងនៅក្នុងសន្និសិទសារព័ត៌មានថា ការស៊ើបអង្កេតតម្លាភាពមួយ នឹងត្រូវបានធ្វើឡើងនៅក្នុងករណីយន្តហោះធ្លាក់។
យ៉ាងណាក៏ដោយ មូលហេតុដែលបង្កអោយយន្តហោះធ្លាក់នៅមិនទាន់បានដឹងនៅឡើយ។
យន្តហោះធ្លាក់ កើតឡើងនៅមុនពេលដែលពលរដ្ឋម៉ូស្លីមប្រារព្ធពិធីបុណ្យអ៊ីដ ជាពេលវេលាដែលពលរដ្ឋប៉ាគីស្ថានត្រូវធ្វើដំណើរទៅសួរសុខទុក្ខសាច់ញាតិ។ យន្តហោះ Airbus A320 ហោះហើរពីទីក្រុងឡាហ័រ ទៅកាន់ទីក្រុងការ៉ាឈិ មានដឹកអ្នកដំណើរ៩១នាក់ និងអ្នកបម្រើការលើយន្តហោះ៨នាក់។
ប្រទេសប៉ាគីស្ថាន ទើបតែបើកអោយមានការហោះហើរក្នុងស្រុកឡើងវិញ បន្ទាប់ពីបិទមួយរយៈដើម្បីទប់ស្កាត់ការឆ្លងរាលដាលជំងឺកូវីដ១៩។
ប្រែសម្រួល៖ ទួត ណាវ័ន្ត