ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
នៅលើផ្លូវហាយវ៉េមួយនៅកណ្តាលរដ្ឋកាលីហ្វ័រញ៉ាសហរដ្ឋអាមេរិកកាលពីប៉ុន្មានសប្តាហ៍មុនមាន សត្វខ្លាឃ្មុំជើង២និងដៃ២កំពុងដើរតាមផ្លូវនេះដែលគួរឱ្យភ្ញាក់ផ្អើលបំផុតប៉ុន្តែកុំបារម្ភអីព្រោះវាមិនមែនជាខ្លាឃ្មុំពិតនោះទេវាគ្រាន់តែជាបុរសម្នាក់ស្លៀកឈុតខ្លាឃ្មុំតែប៉ុណ្ណោះ។
បុរសម្នាក់ឈ្មោះ Jesse Larios អាយុ៣៣ឆ្នាំបានស្លៀកពាក់ឈុតខ្លាំឃ្មុំដែលគេហៅថា ប៊ែរសាន់ (Bearsun) ដោយគាត់បានសម្រេចចិត្តដើរពីទីក្រុងឡូសអាន់ជឺឡេសទៅកាន់ទីក្រុងសានហ្វ្រាន់ស៊ីស្កូរដ្ឋកាលីហ្វ័រញ៉ាសហរដ្ឋអាមេរិកនៅក្នុងឈុតខ្លាឃ្មុំប៊ែរសាន់នេះ។
លោក Larios បាននិយាយក្នុងអំឡុងពេលឈប់សម្រាកនៅតំបន់ Gilroy ថាកាលពីថ្ងៃពុធថា ជាការពិតវាជាការសម្រេចចិត្តភ្លាមៗនិងដ៏គួរឱ្យចម្លែកមួយព្រោះថា គាត់មិនបានត្រៀមទុកមុននោះទេប៉ុន្តែគាត់ចូលចិត្តធ្វើបែបនេះពោលគឺគាត់ចូលចិត្តធ្វើអ្វីៗសប្បាយ។
ការសម្រេចចិត្តរបស់លោក Larios នេះបានទាក់ទាញអ្នកគាំទ្រពីគ្រប់ទិសទីរហូតមានអ្នកខ្លះចង់បរិច្ចាគថវិកាផងដែរជាហេតុធ្វើឱ្យគាត់បង្កើតលេខគណនីដាក់ឈ្មោះ GoFundMe ហើយមកដល់ពេលនេះគាត់បានប្រមូលបានថវិកាជាង ៧ ពាន់ដុល្លារអាមេរិក។
លោក Larios បានឈប់សម្រាកនៅតាមផ្លូវដើម្បីគេងនិងញ៉ាំអាហារប៉ុន្តែមិនធ្វើអ្វីច្រើនផ្សេងទៀតនោះទេក្រោយពីគាត់បានចាប់ផ្តើមចេញដំណើរនៅថ្ងៃទី១២ ខែមេសា ហើយការធ្វើដំណើរនេះមិនបានកំណត់ច្បាស់ទេព្រោះគាត់ធ្វើដំណើរតាមធម្មតាដោយមិនប្រញាប់ពេកនោះទេ៕
ប្រែសម្រួល៖ ប៉ិច ស៊ីនួន