ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
អង្គការសុខភាពពិភពលោកប្រកាសនៅថ្ងៃនេះថាគេរកឃើញវត្តមានមេរោគខូវីដ១៩បម្លែងខ្លួនថ្មីដែលមានប្រភពនៅប្រទេសឥណ្ឌា ចាប់ផ្ដើមឆ្លងរាលដាលទៅដល់ប្រទេសចំនួន៤៤។ មេរោគប្រភេទប៊ី១៦១៧ (B.1.617) កើតឡើងដំបូងកាលពីខែតុលាឆ្នាំ២០២០ ត្រូវរកឃើញនៅក្នុងសំណាកជាង៤៥០០ ដែលបង្ហោះនៅលើទិន្នន័យរបស់ប្រទេសទាំងនោះ។
អង្គការសុខភាពពិភពលោកប្រកាសថាគេទើបតែរកឃើញវត្តមាននៃមេរោគបម្លែងខ្លួននៅប្រទេសឥណ្ឌានោះ បានឆ្លងទៅដល់ប្រទេសចំនួន៥បន្ថែមទៀត។ WHO នឹងធ្វើបច្ចុប្បន្នភាពរបាយការណ៍របស់ខ្លួនជារៀងរាល់សប្ដាហ៍។
ក្រៅពីប្រទេសឥណ្ឌា គេរកឃើញថាមេរោគបម្លែងខ្លួនដែលមានប្រភពនៅប្រទេសអង់គ្លេស បានបង្កការឆ្លងរាតត្បាតខ្លាំងជាងគេ។ ប៉ុន្តែមេរោគសន្ដានប៊ី១៦១៧នៅប្រទេសឥណ្ឌា ជាអ្វីដែលWHOចាត់ទុកជារឿងដែលគួរឲ្យព្រួយបារម្ភកម្រិតពិភពលោក។ រហូតមកដល់ពេលនេះ, មេរោគខូវីដ១៩បានបម្លែងខ្លួនថ្មីៗចំនួនបួនប្រភេទនៅអង់គ្លេស ប្រេស៊ីល អាហ្វ្រិកខាងត្បូង និងឥណ្ឌា។
មេរោគទាំងនេះបង្កការព្រួយបារម្ភខ្លាំង ព្រោះពួកវាមានលក្ខណៈកាចសាហាវ ឆ្លងរាលដាលឆាប់រហ័ស បណ្ដាលឲ្យមានអត្រាមរណភាពខ្ពស់ ហើយអាចទប់ទល់នឹងវ៉ាក់សាំងដែលកំពុងប្រើប្រាស់សព្វថ្ងៃ។
WHO សន្និដ្ឋានថាមូលហេតុដែលធ្វើឲ្យប្រទេសឥណ្ឌារងគ្រោះខ្លាំងដោយសារជំងឺខូវីដ១៩ ព្រោះប្រទេសនេះមានមេរោគខូវីដ១៩ច្រើនប្រភេទរស់នៅឡូកឡំគ្នាជាមួយសន្ដានមេរោគប៊ី១៦១៧។ នៅទីក្រុងធំៗទូទាំងប្រទេសឥណ្ឌា ការខ្វះខាតអុកស៊ីហ្សែន និងគ្រែគេង ជាបញ្ហាធំបំផុត៕
ប្រែសម្រួល៖អនសំអាង
