ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
សហរដ្ឋអាមេរិក នៅតែបន្តជាប្រទេសដែលមានអ្នកជំងឺកូវីដ១៩ច្រើនជាងគេបំផុតនៅក្នុងពិភពលោក ខណៈដែលប្រេស៊ីល ជំនួសប្រទេសរុស្ស៊ីក្លាយជាប្រទេសទី២ ដែលមានអ្នកជំងឺកូវីដ១៩ច្រើនបំផុត។
គិតមកដល់ត្រឹមថ្ងៃសៅរ៍នេះ នៅទូទាំងសហរដ្ឋអាមេរិក មានអ្នកជំងឺកូវីដ១៩ មានចំនួនលើសពី ១លាន៦សែន នាក់គឺមានដល់ទៅ(១៦០០៩៣៧នាក់)។ យោងតាមមហាវិទ្យាល័យ Johns Hopkins។
ស្របគ្នា តួលេខអ្នកស្លាប់ដោយសារជំងឺកូវីដ១៩ នៅទូទាំងអាមេរិកបានកើនឡើង ដល់៩៥៩៧២នាក់ ខណៈញូវយ៉ក ជារដ្ឋដែលរងគ្រោះជំងឺកូវីដ១៩ធ្ងន់ធ្ងរជាងគេ មានចំនួនអ្នក ស្លាប់២៨៨៥៣នាក់។
តួលេខអ្នកជំងឺកូវីដ១៩សរុប នៅទូទាំងប្រទេសប្រេស៊ីលមានចំនួន៣៣០ ៨៩០នាក់ គិតមកដល់ត្រឹម ថ្ងៃសៅរ៍នេះ នាំមុខប្រទេសរុស្ស៊ី ក្លាយជាប្រទេសទី២នៅក្នុងពិភពលោកជាប្រទេសមានអ្នកជំងឺកូវីដ ១៩ច្រើនបំផុតបន្ទាប់ពីសហរដ្ឋអាមេរិក។
ប្រទេសប្រេស៊ីល នៅត្រឹមថ្ងៃសុក្រតែមួយថ្ងៃ មានអ្នកជំងឺកូវីដ១៩ឆ្លងថ្មីចំនួន២០៨០៣នាក់ ជាតួលេខ កើនឡើងប្រចាំថ្ងៃខ្ពស់បំផុត ចាប់តាំងពីជំងឺកូវីដ១៩ករណីទី១ ត្រូវបានប្រកាសឡើងនៅប្រេស៊ីលនៅ ថ្ងៃទី១៧មីនា។
នៅថ្ងៃសុក្រដដែល អ្នកជំងឺកូវីដ១៩ចំនួន១០០១នាក់ស្លាប់ ធ្វើអោយតួលេខអ្នកស្លាប់ ដោយសារជំងឺកូវីដ១៩នៅប្រទេសប្រេស៊ីលបានកើនឡើងដល់២១០៤៨នាក់។
ប្រទេសទី៣នៅក្នុងពិភពលោកដែលឆ្លងជំងឺកូវីដ១៩ច្រើនបំផុតគឺប្រទេសរុស្ស៊ីដែលមានដល់ទៅ៣២៦៤៤៨នាក់ ខណៈអ្នកស្លាប់មាន៣២៤៩នាក់។ បើប្រៀបធៀបឃើញថា អ្នកស្លាប់ដោយសារជំងឺកូវីដ ១៩ នៅប្រទេសរុស្ស៊ីនៅមានកម្រិតទាបនៅឡើយ ខណៈមានមនុស្សច្រើនជាង៣សែននាក់ហើយ ឆ្លងជំងឺ។
នៅទីក្រុងម៉ូស្គូ បានរកឃើញអ្នកឆ្លងជំងឺកូវីដ១៩ថ្មី នៅថ្ងៃសុក្រចំនួន២៩៨៨នាក់ ដែលធ្វើអោយតួលេខ សរុបអ្នកកើតជំងឺកូវីដ១១នៅទូទាំងទីក្រុងនេះមាន១៥៨២០៧នាក់។
ប្រែសម្រួល៖ ទួត ណាវ័ន្ត