ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ប្រតិកម្មជុំវិញការរើសអើងពូជសាសន៍ និងភាពពុករលួយក្នុងកម្មវិធីពានរង្វាន់ភាពយន្ត Golden Globes ត្រូវបានគេមើលឃើញថាកំពុងមានផលប៉ះពាល់កាន់តែធំនៅក្នុងពិភពសិល្បៈហូលីវូដ។
បណ្តាញទូរទស្សន៍អាមេរិក NBC បានប្រកាសកាលពីថ្ងៃទី១០ ឧសភា ថាខ្លួននឹងមិនចាក់ផ្សាយកម្មវិធី Golden Globes ទៀតនោះទេ ស្របពេលតារាសម្ដែងរឿង “Mission Impossible” លោក Tom Cruise ក៏បានប្រគល់ពានរង្វាន់ដែលលោកទទួលបានកន្លងមកឲ្យទៅកម្មវិធីវិញទាំងអស់។
សូមបញ្ជាក់ថា កម្មវិធី Golden Globes គឺជាកម្មវិធីពានរង្វាន់ហូលីវូដដ៏ធំបន្ទាប់ពីកម្មវិធីអូស្កា និងត្រូវបានរៀបចំឡើងដោយសមាគមសារព័ត៌មានអន្តរជាតិហូលីវូត HFPA។
សមាគមមួយនេះនេះកំពុងស្ថិតក្រោមការឃ្លាំមើលយ៉ាងដិតដល់បន្ទាប់ពីលទ្ធផលស៊ើបអង្កេតចេញផ្សាយដោយកាសែត Los Angeles Times បានបង្ហាញថាសមាជិកអ្នកកាសែត ៨៧ នាក់ក្នុងសមាគមនោះគ្មានជនជាតិស្បែកខ្មៅសូម្បីម្នាក់ និងបានបង្ហាញពីភាពមិនប្រក្រតីផ្នែកហិរញ្ញវត្ថុរបស់សមាគមមួយនេះ។
របាយការណ៍នេះបានបង្ហាញថាសមាជិកមួយចំនួនរបស HFPA បានបង្កើតឱ្យមានសុន្ទរកថារើសអើងភេទ និងប្រកាន់ពូជសាសន៍ ព្រមទាំងទទួលបានសំណូកពីតារាល្បី និងស្ទូឌីយោធំៗមួយចំនួនជាថ្នូរនឹងពានរង្វាន់។
ក្រុមហ៊ុនកម្សាន្តធំៗរួមមាន Netflix, Amazon Studios, WarnerMedia និងបណ្ដាផលិតកម្ម ហូលីវូដរាប់សិបក្រុមហ៊ុនទៀតបាននិយាយថាពួកគេនឹងមិនធ្វើការជាមួយសមាគម HFPA ទៀតទេ ដរាបណាពួកគេមិនមានការផ្លាស់ប្តូរឲ្យបានសមរម្យ ខណៈសិល្បករជាច្រើនដូចជា Scarlett Johansson និង Mark Ruffalo ក៏បានចូលរួមរិះគន់អំពីបញ្ហានេះដែរ ៕
ប្រែសម្រួល៖ វ៉ាន់ថន