ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
សហរដ្ឋអាមេរិកថ្លែងថាខ្លួនពិតជាមានកង្វល់យ៉ាងខ្លាំងចំពោះសកម្មភាពយោធារបស់ប្រទេសចិន ដែលចាប់ផ្ដើមបង្ហាញការគំរាមកំហែងកាន់តែខ្លាំងឡើងចំពោះសន្តិសុខជាតិរបស់កោះតៃវ៉ាន់។ ការថ្លែងបែបនេះធ្វើឡើងតាមរយៈអ្នកនាំពាក្យក្រសួងការបរទេសនៅក្នុងសន្តិសីទកាសែត។ សហរដ្ឋអាមេរិកថាខ្លួននៅតែប្រកាន់គោលជំហរយ៉ាងរឹងមាំដដែលនៅក្នុងការការពារកោះតៃវ៉ាន់។
អ្នកនាំពាក្យក្រសួងការបរទេសសហរដ្ឋអាមេរិកថ្លែងថា «សហរដ្ឋអាមេរិកនៅតែប្រកាន់យកគោលជំហរប្រឆាំងជំទាស់នឹងការប្រើប្រាស់កម្លាំង ឬការបង្ខិតបង្ខំតាមគ្រប់រូបភាព ដូចដែលមានចែងនៅក្នុងច្បាប់ស្ដីពីកិច្ចទំនាក់ទំនងជាមួយកោះតៃវ៉ាន់។ ទង្វើនេះអាចធ្វើឲ្យអន្តរាយទៅដល់ប្រព័ន្ធសន្តិសុខ, ប្រព័ន្ធសង្គមកិច្ច និងប្រព័ន្ធសេដ្ឋកិច្ចរបស់ប្រជាពលរដ្ឋតៃវ៉ាន់»។
ថ្មីៗនេះ គេឃើញយន្តហោះចម្បាំងរបស់ប្រទេសចិនបានហោះទៅកៀកនឹងដែនអាកាសរបស់កោះតៃវ៉ាន់ ដើម្បីបង្ហាញកម្លាំងគាបសង្កត់។ ប្រទេសចិនតែងតែចិញ្ចឹមចិត្តចង់យកកោះតៃវ៉ាន់មកគ្រប់គ្រងវិញ។ បើកោះតៃវ៉ាន់នៅតែរឹងទទឹង, ចិនអាចនឹងប្រើប្រាស់កម្លាំងយោធាវាយប្រហារតែម្ដង។ ជាពិសេស បើកោះនេះហ៊ានប្រកាសឯករាជ្យ។ ប៉ុន្តែរដ្ឋមន្ត្រីការពារជាតិតៃវ៉ាន់ក៏មិនអន់ប៉ុន្មានដែរ។
លោកនិយាយដោយប្រាកដប្រជាថាតៃវ៉ាន់សុខចិត្តតស៊ូដល់ដំណាក់កាលចុងក្រោយ ដើម្បីការពារកោះនេះពីការវាយប្រហាររបស់ប្រទេសចិន។ តៃវ៉ាន់ត្អូញត្អែរថាយន្តហោះចម្បាំងរបស់ប្រទេសចិនតែងតែហោះទៅកៀកនឹងដែនអាកាសរបស់ខ្លួនជាញឹកញាប់។ មិនតែប៉ុណ្ណោះ ប្រទេសចិនបានបញ្ជូននាវាចម្បាំង និងនាវាដឹកយន្តហោះ ដើម្បីធ្វើសមយុទ្ធយោធាកៀកនឹងដែនសមុទ្រតៃវ៉ាន់។
យោងតាមរដ្ឋមន្ត្រីការពារជាតិតៃវ៉ាន់, យន្តហោះចម្បាំងរបស់ចិន១៥គ្រឿងបានហោះទៅក្បែរកោះតៃវ៉ាន់។ យន្តហោះប្រឆាំងនឹងនាវាមុជទឹកក៏បានបើកកាត់ច្រកសមុទ្រដែលស្ថិតនៅចន្លោះកោះតៃវ៉ាន់ និងប្រទេសហ្វ៊ីលីពីនផងដែរ៕
ប្រែសម្រួល៖អនសំអាង