សារព័ត៌មាន និងមេដឹកនាំ១ចំនួននៅលើពិភពលោកផ្សព្វផ្សាយ និងចូលរួមមរណទុក្ខការសោយទិវង្គតរបស់ព្រះអង្គម្ចាស់ហ្វ៊ីលីព នៃចក្រភពអង់គ្លេស។

ដំណឹងស្ដីពីការសោយទិវង្គតរបស់ព្រះអង្គម្ចាស់ហ្វ៊ីលីព នៃចក្រភពអង់គ្លេស កាលពីយប់មិញ ត្រូវសារព័ត៌មានចុះផ្សាយព្រោងព្រាត។ នៅក្នុងចំណោមនោះក៏មានសារព័ត៌មានរបស់បារាំង និងរុស្ស៊ីផងដែរ។

ព្រះអង្គម្ចាស់ហ្វ៊ីលីពជាស្វាមីរបស់ព្រះមហាក្សត្រិយានីអេលីហ្សាបែតទី២ អស់រយៈពេលជាង៧០ឆ្នាំ។ ព្រះអង្គបានជួយរៀបចំកែសម្រួលរបបរាជានិយមនៅអង់គ្លេសឲ្យមានលក្ខណៈទំនើបស្របតាមកាលៈទេសៈ និងសម័យកាលវិវត្តនៃសង្គមជាតិ។

ព្រះអង្គក៏ជាអ្នកដែលជួយរៀបចំសណ្ដាប់ធ្នាប់នៅក្នុងព្រះរាជវង្សានុវង្ស ដោយឆ្លងកាត់វិបត្តិជាច្រើនលើកច្រើនសា។ នៅពេលសុគត, ព្រះអង្គមានព្រះជន្ម៩៩វស្សា។ មេដឹកនាំប្រទេសខ្លះសម្ដែងមរណទុក្ខជាមួយព្រះញាតិវង្សានុវង្សអង់គ្លេស។

នៅក្នុងនោះ មានលោកចូបៃដឹន ប្រធានាធិបតីសហរដ្ឋអាមេរិក និងប្រធានាធិបតីម៉ិកស៊ីកូផងដែរ។ លោកបៃដឹនចាត់ទុកព្រះអង្គម្ចាស់ហ្វ៊ីលីពជាបុគ្គលគំរូ៕

ប្រែសម្រួល៖ណាវ័ន្ត