ថ្ងៃពុធ ទី២៤ ខែមេសា ឆ្នាំ២០២៤
ថ្ងៃពុធ ទី២៤ ខែមេសា ឆ្នាំ២០២៤
ចក្រភពអង់គ្លេស នឹងគាំទ្របណ្តាប្រទេសតំបន់អាស៊ីអាគ្នេយ៍នៅក្នុងកិច្ចខិតខំប្រឹងប្រែងដោះស្រាយវិបត្តិប្រទេសមីយ៉ាន់ម៉ា។ នេះបើតាមការអោយដឹងពីរដ្ឋមន្ត្រីការបរទេសឥណ្ឌូនេស៊ីនៅថ្ងៃពុធ បន្ទាប់ពីលោកស្រីរដ្ឋមន្ត្រីការបរទេស បានជួបជាមួយសមភាគីអង់គ្លេស។
ប្រទេសឥណ្ឌូនេស៊ី ជាប្រទេសមួយស្ថិតនៅក្នុងចំណោមបណ្តាប្រទេសជាច្រើនដែលជម្រុញអោយមានកិច្ចពិភាក្សាជាន់ខ្ពស់រវាងបណ្តាមេដឹកនាំសមាគមន៍ប្រជាជាតិអាស៊ីអាគ្នេយ៍ ហៅកាត់ថាអាស៊ាន លើបញ្ហាប្រទេសមីយ៉ាន់ម៉ា។ ការបង្ក្រាបបាតុករនៅប្រទេសមីយ៉ាន់ម៉ា ពីសំណាក់យោធា បានសម្លាប់មនុស្សជិត៦០០នាក់ ដែលពួកគេសុទ្ធសឹងជាអ្នកតវ៉ាប្រឆាំងនឹងរដ្ឋប្រហារថ្ងៃ១កុម្ភៈ។
ប្រទេសអង់គ្លេសដែលធ្លាប់ជាម្ចាស់អាណានិគមនិយមលើប្រទេសមីយ៉ាន់ម៉ា ស្ថិតនៅក្នុងចំណោមប្រទេសជាអ្នករិះគន់មីយ៉ាន់ម៉ាខ្លាំងបំផុត ទៅលើបញ្ហាដែលយោធាផ្តួលរំលំរដ្ឋាភិបាលជាប់ឆ្នោតមីយ៉ាន់ម៉ារបស់លោកស្រីអ៊ុងសានស៊ូជី។ ប្រទេសអង់គ្លេសក៏ជាប្រទេសមួយស្ថិតនៅក្នុងចំណោមបណ្តាប្រទេសលោកខាងលិចជាច្រើនផ្សេងទៀតដែល បានដាក់ទណ្ឌកម្មតឹងរឹងលើឧត្តមសេនីយ៍យោធាមីយ៉ាន់ម៉ាជាច្រើនរូប រួមនិងបានដាក់ទណ្ឌកម្មលើបណ្តាញអាជីវកម្មរបស់ក្រុមយោធាផងដែរ ជាការឆ្លើយតបទៅនឹងរដ្ឋប្រហារដែលយោធាបានធ្វើឡើង។
លោកស្រី រ៉េតណូ ម៉ាសូឌី (Retno Marsudi) រដ្ឋមន្ត្រីក្រសួងការបរទេសនៃប្រទេសឥណ្ឌូនេស៊ី បានជួបជាមួយនិងលោក ដូមីនិក រ៉ាប(Dominic Raab) រដ្ឋមន្ត្រីការបរទេសអង់គ្លេស នៅទីក្រុងចាកាតា ប្រទេសឥណ្ឌូនេស៊ី។
ប្រែសម្រួល៖ណាវ័ន្ត