ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
ក្រុមហ៊ុនផ្សារទំនើបរបស់ថៃ ដែលមានឈ្មោះថា Central Retail Corporation បានបង្ហាញអំពីគម្រោងវិនិយោគរបស់ខ្លួន ដែលគ្រោងនឹងបោះទុន ១ពាន់ ១រយលានដុល្លារអាមេរិក ពង្រីកបណ្តាញផ្សារទំនើបនៅក្នុងប្រទេសវៀតណាម ក្នុងរយៈពេល ៥ឆ្នាំខាងមុខ។ នេះបើយោងតាមការចេញផ្សាយដោយ សារព័ត៌មានវៀតណាម នៅថ្ងៃនេះ។
លោក ភ្វីលីព អគ្គនាយកប្រតិបត្តិនៃក្រុមហ៊ុន Central Retail Vietnam បានលើកឡើងថា គម្រោងវិនិយោគរយៈពេល ៥ឆ្នាំនេះ នឹងផ្តោតទៅលើការអភិវឌ្ឍន៍គ្រប់ពហុវិស័យទាំងអស់។
លោកបន្តថា វិស័យលក់ដុំ និងរាយរបស់វៀតណាម មានកំណើន ៧% កាលពីត្រីមាសទី ៤ ឆ្នាំ ២០២០កន្លងទៅ ហើយកំណើននេះ នឹងបន្តភាពខ្លាំងក្លារបស់វា នៅក្នុងឆ្នាំ ២០២១នេះ ដែលធ្វើឲ្យទីផ្សារវៀតណាម កាន់តែទាក់ទាញឡើងមួយកម្រិតទៀត។
កាលពីឆ្នាំ ២០២០កន្លងទៅ ក្រុមហ៊ុនផ្សារទំនើបរបស់ថៃមួយនេះ បានបោះទុនវិនិយោគបង្កើតផ្សារទំនើប ៤ ក្នុងប្រទេសវៀតណាម ហើយបានដូរឈ្មោះពី ផ្សារទំនើប Big C មកជា ផ្សារទំនើប GO! វិញ។
យ៉ាងណាក៏ដោយ សម្រាប់គម្រោងក្នុងឆ្នាំ ២០២១នេះ ក្រុមហ៊ុនគ្រោងនឹងបោះទុន ២១១លានដុល្លារអាមេរិក ពង្រីកសាខានៅតាមបណ្តាខេត្តសំខាន់របស់ វៀតណាម ទាំងប៉ែកខាងជើង និងខាងត្បូង។
សូមជម្រាបដែរ ក្នុងរយៈពេល ៩ឆ្នាំកន្លងមក ដែលក្រុមហ៊ុនផ្សារទំនើបថៃ ចូលមកធ្វើអាជីវកម្មក្នុងប្រទេសវៀតណា ឃើញថា មុខទំនិញចំណីអាហារ ជាប្រភពចំណូលសំខាន់បំផុតរបស់ផ្សារទំនើបនេះ ដែលស្មើនឹង ៧០% នៃប្រាក់ចំណូលសរុប ហើយបច្ចុប្បន្នមានផ្សារទំនើបចំនួន ៣៧សាខា ហាងលក់ទំនិញ ២៣០សាខា នៅក្នុងខេត្តក្រុងចំនួន ២៧នៃប្រទេសវៀតណាម និងមានអតិថិជនជាមធ្យម ១៧ម៉ឺននាក់ក្នុងមួយថ្ងៃ៕
អត្ថបទ៖ ងួន សុភ័ត្រ្តា និងរូបភាពឯកសារ