ប្រទេសកូរ៉េខាងត្បូងនៅថ្ងៃច័ន្ទ បានអោយដឹងថា រកមិនឃើញការជាប់ទាក់ទងគ្នារវាងវ៉ាក់ស៊ាំងប្រឆាំងជំងឺកូវីដ១៩ និងករណីមនុស្សស្លាប់ជាច្រើននាក់កាលពីពេលថ្មីៗនេះឡើយ។

អាជ្ញាធរសុខាភិបាលនៃប្រទេសកូរ៉េខាងត្បូងដែលបានធ្វើការស៊ើបអង្កេតទៅលើករណីមនុស្ស៨នាក់ស្លាប់ក្រោយពីចាក់វ៉ាក់ស៊ាំងកូវីដ១៩អាស្ត្រា សេនេកា(AstraZeneca)​ នោះ បានលើកឡើងថា ពួកគេ រកមិនឃើញភស្តុតាងដែលបញ្ជាក់វ៉ាក់ស៊ាំងកូវីដ១៩អាស្ត្រា សេនេកា(AstraZeneca)​ ជាមូលហេតុដែលធ្វើអោយអ្នកទាំងនោះស្លាប់។

ថ្លែងនៅក្នុងសន្និសិទសារព័ត៌មាន ប្រធានទីភ្នាក់ងារបង្ការ និងគ្រប់គ្រងជំងឺឆ្លងប្រទេសកូរ៉េខាងត្បូង (KDCA)  បានលើកឡើងថា រកមិនឃើញការជាប់ទាក់ទងរវាងមូលហេតុនៃការស្លាប់ និងការចាក់វ៉ាកស៊ាំងប្រឆាំងជំងឺកូវីដ១៩ របស់អ្នកស្លាប់ទាំងអស់នោះឡើយ។

ប្រទេសកូរ៉េខាងត្បូងបានចាប់ផ្តើមចាក់វ៉ាក់ស៊ាំងអោយពលរដ្ឋនិងកម្មករនៅផ្ទះថែទាំមនុស្សចាស់និងបុគ្គលស្ថិតនៅក្នុងក្រុមហានិភ័យនៅចុងខែកុម្ភៈ  ដែលគិតមកដល់ត្រឹមថ្ងៃអាទិត្យ មានមនុស្ស៣សែន១ម៉ឺន៦ពាន់៨៦៥នាក់ បានចាក់វ៉ាក់ស៊ាំងលើកទី១រួចរាល់។

ប្រែសម្រួល៖ណាវ័ន្ត