ថ្ងៃសុក្រ ទី២៩ ខែមីនា ឆ្នាំ២០២៤
ថ្ងៃសុក្រ ទី២៩ ខែមីនា ឆ្នាំ២០២៤
តារាចម្រៀងយុវវ័យដែលកំពុងល្បីខ្លាំងនៅអាមេរិកគឺ Billie Eilish ថ្មីៗនេះទើបតែចេញភាពយន្តមួយដែលនិយាយអំពីខ្សែជីវិត និងដំណើរលើវិថីសិល្បៈរបស់នាងផ្ទាល់តែម្ដង
ភាពយន្តឯកសារថ្មីមួយបានចងក្រងសាច់រឿងអំពីការកសាងកេរ្តិ៍ឈ្មោះរបស់ តារាចម្រៀង Billie Eilish (ប៊ីលី អេលីស) និងសាច់រឿងជាច្រើនទៀតអំពីតារាចម្រៀងវ័យ ១៩ឆ្នាំរូបនេះតាំងពីការចាប់ផ្ដើមថតចម្រៀងក្នុងផ្ទះ បរាជ័យក្នុងទំនាក់ទំនងស្នេហា និងពេលវេលាដែលនាងបានជួបអាយដលរបស់នាងគឺតារាចម្រៀង Justin Bieber។
មានចំណងជើងថា "Billie Eilish: The World's a Little Blurry" ភាពយន្តនេះក៏បានបង្ហាញពីទំនាក់ទំនងជិតស្និទ្ធរបស់តារាចម្រៀង និងអ្នកនិពន្ធចម្រៀងអាមេរិករូបនេះជាមួយគ្រួសារ ការសម្ដែងតាមផ្លូវ និងលើឆាក ជំនួបជាមួយអ្នកគាំទ្រ និងនៅពេលឡើងទទួលពានរង្វាន់ Grammy ចំនួន ៥ ដែលជាកម្មវិធីពានរង្វាន់ដ៏កិត្តិយសបំផុតក្នុងវិស័យចម្រៀង។
ផលិតករភាពយន្តនេះ គឺលោក R.J. Cutler (អ ជេ ខាត់ធ្លើ) បានជួប Eilish លើកដំបូង នៅពេលដែលនាងមានអាយុ ១៦ ឆ្នាំ និងបានពណ៌នាអំពីតារាចម្រៀងរូបនេះថាជា យុវតីដ៏ពោរពេញដោយសមត្ថភាព រួសរាយ ហើយកំប្លែង និងជាបុគ្គលដែលលោកពេញចិត្តនឹងយកខ្សែជីវិតផលិតជាភាពយន្តខ្លាំងមែនទែន។
គួរបញ្ជាក់ថា ខ្សែភាពយន្តត្រូវបានចេញផ្សាយនៅលើបណ្ដាញ Apple TV + ដែលជាសេវាទស្សនាភាពយន្តអនឡាញរបស់ក្រុមហ៊ុន Apple កាលពីចុងសប្ដាហ៍កន្លងទៅ ៕
ប្រែសម្រួល៖ វ៉ាន់ថន