ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
គិតចាប់ពីខែមករា ដល់ខែកុម្ភៈកន្លងទៅនេះ ប្រទេសវៀតណាម នៅតែធ្វើបានល្អក្នុងមុខជំនួញពាណិជ្ជកម្មរបស់ខ្លួន ដោយសម្រេចបាននូវ អតិរេកពាណិជ្ជកម្មជាង ១ពាន់ ៣រយលានដុល្លារអាមេរិក ដោយក្នុងនោះការនាំចេញរបស់វៀតណាម សម្រេចបានប្រមាណ ៤៨ពាន់លានដុល្លារអាមេរិក។ នេះបើយោងតាមការចុះផ្សាយដោយ សារព័ត៌មាន Vietnam Express នៅថ្ងៃនេះ។
ក្នុងរយៈពេល ២ខែ ដើមឆ្នាំ ២០២១នេះ វៀតណាម សម្រេចនូវ ការនាំចេញទំនិញនិងសេវាកម្មប្រមាណ ៤៨ពាន់លានដុល្លារអាមេរិក ដែលមានការកើនឡើងដល់ទៅ ២៣% ខណៈការនាំចូលទំនិញមកវិញ គឺមានជាង ៤៧ពាន់លានដុល្លារអាមេរិក ដែលមានកំណើន ២៦% ផងដែរ។
ផលិតផលឧស្សាហកម្មធនធ្ងន់ និងធនធានរ៉ែ ជាទំនិញនាំចេញច្រើនជាងគេ ដែលមានតម្លៃជាង ២៦ពាន់លានដុល្លារអាមេរិក ខណៈទំនិញនៅក្នុងឧស្សាហកម្មធនស្រាល និងសិប្បកម្ម មានតម្លៃនាំចេញជាង ១៧ពាន់លានដុល្លារអាមេរិក។
ប្រទេសចិន នៅតែជាអ្នកទិញទំនិញវៀតណាមច្រើនជាងគេបំផុត ដែលមានទំហំទឹកប្រាក់ជាង ១៧ពាន់លានដុល្លារអាមេរិក ហើយប្រទេសកូរ៉េខាងត្បូង ឈរនៅលេខរៀងទី ២។
គួររម្លឹកដែរថា នៅក្នុងឆ្នាំ ២០២០ ដែលមានបញ្ហាប្រឈមជាច្រើន ពាក់ព័ន្ធនឹងវិបត្តិមេរោគកូវីដ១៩នោះ ប្រទេសវៀតណាម អាចសម្រេចបានការនាំចេញផលិតផល និងសេវាកម្មប្រមាណ ២៨១ពាន់លានដុល្លារអាមេរិក ដែលមានកំណើន ៦% ធៀបនឹងឆ្នាំ ២០១៩ ហើយលើសពីនេះទៅទៀតគឺ វៀតណាម រក្សាបាននូវ តុល្យភាពពាណិជ្ជកម្មវិជ្ជមាន ប្រមាណ ១៩ពាន់លានដុល្លារអាមេរិកថែមទៀត៕
អត្ថបទ៖ ងួន សុភ័ត្រ្តា និងរូបភាពឯកសារ