ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
ឯកអគ្គរដ្ឋទូតប្រទេសភូមាប្រចាំអង្គការសហប្រជាជាតិបានបង្ហាញគោលជំហរប្រឆាំងជំទាស់នឹងរបបយោធា ដែលធ្វើរដ្ឋប្រហារផ្ដួលរំលំលោកស្រីអង់សានស៊ូជីពីតំណែង និងចាប់លោកស្រីដាក់ឃុំថែមទៀត។
លោកឯកអគ្គរដ្ឋទូតខ្យាវម៉ូទុន (Kyaw Moe Tun) បានអំពាវនាវឲ្យអង្គការសហប្រជាជាតិប្រើប្រាស់មធ្យោបាយចាំបាច់គ្រប់យ៉ាង ដើម្បីឲ្យរបបយោធាវិលមករកគន្លងប្រជាធិបតេយ្យឡើងវិញ។ លោកថ្លែងនៅក្នុងមហាសន្និបាតអង្គការសហប្រជាជាតិ, បន្ទាប់ពីប្រេសិតពិសេសរបស់អង្គការនេះប្រកាសថាប្រទេសដទៃទៀតមិនគួរទទួលស្គាល់របបយោធានៅភូមាទេ។
ទោះជាយ៉ាងណាក្ដី, ពួកយោធាទំនងជាកាន់អំណាចយ៉ាងតិច១ឆ្នាំទៅមុខទៀត ដោយយោងទៅតាមការដាក់ប្រទេសនៅក្នុងគ្រាអាសន្ន។ ពួកគេសន្យាថានឹងរៀបចំការបោះឆ្នោតប្រកបដោយភាពសេរី និងយុត្តិធម៌។ អំពើរដ្ឋប្រហារនេះមិនទាន់មានប្រទេសណា ឬស្ថាប័នអន្តរជាតិណាប្រកាសគាំទ្រនៅឡើយទេ មានតែប្រកាសថ្កោលទោស និងដាក់ទណ្ឌកម្ម ឬមានតែប្រទេសដែលសុខចិត្តនៅស្ងៀម។
ក្រុមប្រឹក្សាសន្តិសុខអង្គការសហប្រជាជាតិទោះបីមិនបានថ្កោលទោស ប៉ុន្តែបានអំពាវនាវឲ្យពួកយោធាងាកមករកផ្លូវត្រូវ ដោយដោះលែងលោកស្រីអង់សានស៊ូជី, ដោះស្រាយបញ្ហាដោយសន្តិវិធី និងវិលទៅរកគន្លងប្រជាធិបតេយ្យឡើងវិញ៕
ប្រែសម្រួល៖អនសំអាង